RFda mazut to‘kilishi sababli federal darajadagi favqulodda rejim joriy etildi

Rossiya prezidenti Vladimir Putin Kerch bo‘g‘ozida tankerlar halokati oqibatida mazut to‘kilishi sababli federal darajadagi favqulodda holat (FH) e’lon qildi. Bu haqda 26 dekabr, payshanba kuni Qrim rahbari Sergey Aksenov ma’lum qildi. Unga ko‘ra, tabiiy ofat oqibatlarini bartaraf etish uchun federal budjetdan mablag‘ ajratiladi.

Bir kun avval Krasnodar o‘lkasi gubernatori Veniamin Kondratev mintaqaviy darajada favqulodda holat e’lon qilgan edi. Bungacha, 17 dekabrdan Anapa va Temryuk rayonida munitsipal darajada favqulodda holat joriy qilingan. 21 dekabr kuni neft mahsulotlari Qrim qirg‘oqlariga yetib borgach, Kerchda favqulodda holat joriy etildi.

Krasnodar o‘lkasida mazut to‘kilishi sababli favqulodda holat joriy etildi

Krasnodar o‘lkasida Qora dengizdan mazut kelishi davom etayotgani sababli favqulodda holat e’lon qilindi. Bu haqda 25 dekabr kuni mintaqa gubernatori Veniamin Kondratev ma’lum qildi. «Afsuski, Anapa va Temryuk qirg‘oqlariga neft mahsulotlarining to‘kilishi uzoq davom etyapti va to‘xtamayapti, dastlab olimlar va mutaxassislarning hisob-kitoblariga ko‘ra, mazutning asosiy qismi Qora dengiz tubida qolishi kerak edi, bu uni suvda to‘plashga imkon berardi, ammo ob-havo tufayli havo isib, neft mahsulotlari yuqoriga ko‘tarilyapti. Natijada ular bizning plyajlarimizga chiqib kelyapti», - deb yozdi Kondratev.

«Hozirgacha Anapa va Temryuk rayoni rasmiylari tomonidan joriy etilgan favqulodda holat amal qilib kelayotgandi. Ammo vaziyat keskinligicha qolmoqda. Bugundan boshlab o‘lkada favqulodda holat rejimini joriy etishga qaror qildim», — deya qo‘shimcha qildi rasmiy.

U «ilk kunlardanoq yordamga kelgan ko‘ngillilar va o‘lka aholisiga» minnatdorchilik bildirdi. Hozirda butun Rossiya bo‘ylab ko‘ngillilarning harakatlarini muvofiqlashtirgan «Razliv nefti v Chernom more» Telegram-kanalida allaqachon 95 mingdan ortiq ishtirokchi bor. Odamlar mustaqil ravishda plyajlardan mazutni qoplarga yig‘ib, olib ketishyapti, shuningdek, jabrlangan hayvonlarga yordam berishyapti.