O‘zbekistonda taqiqlangan diniy manbalar va materiallar ro‘yxati e’lon qilindi

Oliy sud tomonidan internet jahon tarmog‘idagi diniy ekstremistik, terroristik va aqidaparastlik g‘oyalari bilan yo‘g‘rilgan deb topilgan hamda O‘zbekiston Respublikasining hududiga olib kirish, tayyorlash, saqlash, tarqatish va namoyish etilishi taqiqlangan manba va kontentlar (materiallar) ro‘yxati e’lon qilindi.

2025 yil 8 yanvar holatiga ko‘ra, ro‘yxatga 1 ming 389 ta turli profil, kanal va materiallar kiritilgan. Xususan:

• Facebook ijtimoiy tarmog‘ida 203 ta profil va materiallar;
• Telegram messenjerida 713 ta kanal, guruh va materiallar;
• Instagram ijtimoiy tarmog‘ida 226 ta profillar;
• Youtube video-xostingida 135 ta kanal va turli videolar;
• Odnoklassniki ijtimoiy tarmog‘ida 35 ta profil va materiallar;
• Tik-tok'da 44 ta profil;
• Internet jaxon axborot tarmog‘idagi 13 ta sayt va alohida materiallar;
• 20 ta turli kitob, ma’ruza va nashidalar.

Oliy sud matbuot kotibi Aziz Obidov fuqarolardan «diniy aqidaparastlik, ekstremizm va terrorizm tuzog‘iga tushib qolishdan saqlanishni va ulardan yiroq bo‘lish»ni so‘ragan.

O‘zbekiston Respublikasi Jinoyat kodeksining 244-1-moddasiga ko‘ra, jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etganlik uchun – BHMning ikki yuz baravari miqdorida jarimadan sakkiz yilgacha ozodlikdan mahrum qilish bilan jazosi belgilangan.

Shuningdek, Jinoyat kodeksi 244-3-moddasiga ko‘ra, diniy mazmundagi materiallarni qonunga xilof ravishda tayyorlash, saqlash, olib kirish yoki tarqatganlik uchun BHMning 100 baravari miqdorda jarima yoki 3 yilgacha axloq tuzatish ishlari bilan jazolanadi.