Zaporijjya o‘qqa tutilishi oqibatida 13 kishi halok bo‘ldi

Ukraina rasmiylariga ko‘ra, Rossiyaning Zaporijjya bo‘ylab zarbasi oqibatida 13 kishi halok bo‘lib, kamida 63 kishi yaralangan. Rasmiylar chorshanba kuni kunduzi shahar uzra ikkita boshqariluvchi aviatsiya bombasi tashlanganini ma’lum qildi. Rossiya zarba yuzasidan izoh bermagan.

Foto: Telegram / ivan_fedorov_zp

Zaporijjya shahriga 8 yanvar kuni, mahalliy vaqt bilan soat 16:00 dan o‘tganda hujum qilingan. Tarqalgan videolarga ko‘ra, zarba piyodalar va transport gavjum bo‘ladigan ko‘chaga berilgan.

Oskolkalar tramvayga va ichida yo‘lovchilar bo‘lgan marshrutdagi taksiga tushgan. Bundan tashqari, atrofda qo‘yilgan avtomobillar shikastlangan.

Oblast harbiy ma’muriyati rahbari Ivan Fedorovning ma’lumotiga ko‘ra, Rossiya aviatsiyasi shahar markaziga ikkita boshqariluvchi aviabombalar bilan zarba yo‘llagan. Ukraina IIV zarbalar universal rejalashtirish va tuzatish moduliga ega FAB-500 aviabombalari bilan berilganini ma’lum qilgan.

Rasmiylarning so‘nggi ma’lumotlariga ko‘ra, 13 kishi halok bo‘lib, yana 63 kishi jarohatlangan. Avariya-qutqaruv ishlari yakunlangan.

Dastlabki ma’lumotlarga ko‘ra, yaralanganlar orasida yosh bola ham bor — 13 yoshli qiz shifoxonaga yotqizilgan, uning holati o‘rta og‘irlikda deb baholanmoqda. Jabrlanganlardan kamida to‘rt nafarining ahvoli og‘ir.

Oblast harbiy ma’muriyati rahbari Rossiya bombalari aynan qayerga tushganiga aniqlik kiritmagan, ammo Zaporijjyaning Shevchenkovo rayoni hujumga uchraganini aytgan.

Bu rayonda boshqa obektlar qatori Ukrainadagi yetakchi mudofaa korxonalaridan biri, vertolyot va samolyotlar uchun dvigatellar ishlab chiqariladigan «Motor-Sich» zavodi joylashgan.

Fedorovning so‘zlariga ko‘ra, 9 yanvar Zaporijjyada motam kuni deb e’lon qilinadi.

Ukraina prezidenti Volodimir Zelenskiy halok bo‘lganlar va yaralanganlarning yaqinlariga hamdardlik bildirib, Rossiyaga bosim o‘tkazishga chaqirgan.

«Shaharga ataylab zarba berildi», — deya izoh taqdim etdi Ukraina prezidenti Volodimir Zelenskiy Rossiya hujumiga. «Rossiyaga terror uchun bosim o‘tkazish kerak. Ukrainada insonlar hayotini himoya qilishni qo‘llab-quvvatlash kerak», deb ta’kidladi Zelenskiy.

Ukraina ombudsmeni Dmitro Lubinets ham ushbu hujumga munosabat bildirgan. U shahar o‘qqa tutilishini harbiy jinoyat deb atab, xalqaro hamjamiyatni Rossiyaga qarshi yangi sanksiyalar qo‘llash hamda Ukrainaga ko‘proq havo hujumidan mudofaa vositalari berishga chaqirgan.

Rossiya zarbasidan keyin bosh prokuror ofisi odamlar o‘limiga olib keluvchi harbiy jinoyat sodir etish fakti (Ukraina JK 438-modda, 2-qismi) bo‘yicha sudga qadar surishtiruv ishlari boshlanganini ma’lum qilgan.

Rossiya hukumati va harbiylar Zaporijjyaga zarba yuzasidan rasmiy ma’lumot bermagan.

#Rossiya #Zaporijjya