AQShning saylangan prezidenti Donald Tramp o‘z inauguratsiyasi arafasida Vashingtondagi Capital One Arena kompleksida tarafdorlarining mitingida ishtirok etib, davlat rahbari sifatidagi birinchi kunida ko‘plab farmonlarni imzolashga va’da berdi.
«Biz g‘olibmiz!» — degan Tramp olomon hayqiriqlari ostidagi nutqi avvalida.
U yangi ma’muriyat «Vashingtondagi muvaffaqiyatsiz isteblishment hukmronligiga barham berish» va «Amerikani yana buyuk qilish» niyatida ekanini aytgan.
«Ertaga tushda Amerikaning to‘rt yillik tanazzuli ustidan parda tortiladi va biz Amerikaning kuchli va farovonligi, qadr-qimmati va g‘ururi uchun mutlaqo yangi sahifani ochamiz. Bularning barchasini bir umrga qaytaramiz», — degan Tramp.
U shuningdek noqonuniy immigrantlarning Amerika chegaralariga «bosqini»ni to‘xtatishga, dushanba kungi inauguratsiya nutqida aniq choralarni e’lon qilishga va’da bergan.
Ekspertlar uning millionlab nelegal migrantlarni deportatsiya qilish va’dasi ulkan logistik qiyinchiliklarga uchrashi hamda o‘nlab yoki yuzlab milliard dollarga tushishi mumkinligini aytishmoqda, deb yozadi BBC.
«Amerika xalqi bizga ishondi va buning evaziga biz ularga Amerika tarixida prezidentlik davridagi eng yaxshi birinchi kunni, eng ajoyib birinchi haftani va eng muvaffaqiyatli birinchi 100 kunni beramiz», dedi Donald Tramp tarafdorlariga.
Trampning so‘zlariga ko‘ra, dushanba kuni u amerikaliklarni «juda quvontiradigan» ko‘plab farmonlarni imzolashni rejalashtirgan.
«Barchasi ertadan boshlanadi. Ertaga televizorni tomosha qilish juda zavqli bo‘ladi», — deya va’da bergan Donald Tramp.
Dushanba kuni u 200 dan ortiq hujjatni, jumladan, ijro farmoyishlari va boshqa prezidentlik farmoyishlarini imzolashi kutilmoqda.
«Bayden ma’muriyatining har bir radikal va ahmoqona qarori qasamyod qabul qilganimdan keyingi bir necha soat ichida bekor qilinadi», — deya qo‘shimcha qilgan Tramp.
Tramp o‘zining birinchi tashabbuslari AQSh chegara xavfsizligini ta’minlash, noqonuniy muhojirlarni ommaviy deportatsiya qilish, xilma-xillik tashabbuslarini cheklash, 2021 yil 6 yanvarda Kapitoliyda bo‘lib o‘tgan namoyish ishtirokchilarini afv etish, tabiiy resurslar qazib olishni ko‘paytirish, davlat xizmatchilarining ommaviy almashinuvi va boshqa siyosiy masalalarga tegishli ekanini aytgan.
Trampning chiqishi ancha davomli bo‘ldi va saylovoldi nutqlarini yodga solib yubordi. Tomoshabinlarga videoroliklar namoyish etildi, sahnaga milliarder Ilon Mask chiqib keldi, shuningdek, Tramp o‘zining yangi ma’muriyatidagi muhim amaldorlarni tanishtirdi.
