Ukraina Rossiyaga dronlar bilan hujum qildi: Moskvaga 65 tadan ortiq dron uchirildi

Ukraina uchuvchisiz uchoqlari 11 mart, seshanbaga o‘tar kechasi Rossiya Federatsiyasining bir qancha hududlariga yirik hujum uyushtirdi.

Moskvada havo hujumidan mudofaa kuchlari 69 ta dronni urib tushirdi, dron qoldiqlari Domodedovskaya ko‘chasidagi bino tomiga kichik zarar yetkazdi, dedi Rossiya poytaxti meri Sergey Sobyanin. Mash Telegram-kanali xabariga ko‘ra, binoning yuqori qavatlari shikastlangan — zarba to‘lqini bir nechta derazalarni sindirib tashlagan. Shuningdek, dronlarning Moskva yaqinidagi Vidnoye va Ramenskoyedagi turar joy binolariga urilgani haqida xabarlar bor. Taxminlarga ko‘ra, hujum "Lyutyy" tipidagi uchuvchisiz uchoq tomonidan amalga oshirilgan, deb yozadi Mash.

Moskva oblasti gubernatori Andrey Vorobev uch kishining o‘limi haqida ma’lum qildi. «Kolomna, Zaraysk, Serebryanniye Prudi, Serpuxov, Ramenskoye, Voskresensk, Luxovitsi, Bronnitsi, Domodedovo, Leninskoye, Podolsk, Elektrostal va Kotelnikidan uchuvchisiz uchoqlar haqida xabarlar kelib tushdi», — dedi Vorobev.

UUA bo‘laklari Domodedovo temiryo‘l stansiyasi hududiga tushib, yo‘lning bir qismiga zarar yetkazdi. Domodedovo rahbari Yevgeniya Xrustaleva Domodedovo vokzalidan Moskva va mintaqa tomon poyezdlar harakati to‘xtatilganini ma’lum qildi.

«Kover» rejasi Vnukovo, Jukovskiy va Domodedovo aeroportlarida joriy etildi. Keyinroq Rosaviatsiya Nijniy Novgoroddagi Strigino aeroportida cheklovlar kiritilgani haqida xabar berdi. Lipetsk, Bryansk va Belgorod oblastlarida ham havo hujumidan mudofaa tizimlarining ishlashi qayd etilgan.

Mintaqa rahbari Pavel Malkov o‘zining Telegram-kanalida Ryazan oblasti osmonida dronlarning yo‘q qilingani haqida xabar berdi. Uning so‘zlariga ko‘ra, qurbonlar va infratuzilmaga zarar yetmagan. ASTRA Telegram-kanali guvohlarga tayanib, Ukraina qurolli kuchlarining Ryazan oblastidagi nishoni "Dyagilevo" harbiy aerodromi bo‘lishi mumkinligi haqida yozmoqda.

Avvalroq Kursk oblasti aholisi ijtimoiy tarmoqlarda UUA hujumi tufayli kamida beshta portlash sodir bo‘lgani haqida xabar bergan edi. Mintaqa gubernatori vazifasini bajaruvchi Aleksandr Xinshteyn 10 mart kuni kechqurun Belovskiy rayoni Belaya posyolkasidagi «Dobrynya» savdo markaziga raketa zarbasi berilgani haqida xabar qildi. Zarba natijasida to‘rt kishi halok bo‘ldi, yana to‘qqiz kishi turli darajadagi og‘irlikdagi jarohatlar oldi. Ukraina tomoni savdo markaziga qilingan hujumga izoh bermadi.