Ukraina prezidenti Volodimir Zelenskiy Germaniyada Fridrix Mers kansler bo‘lganidan so‘ng Berlin Kiyevga TAURUS uzoq masofali qanotli raketalarni yetkazib berishiga umid bildirdi. Ukraina rahbari bu so‘zlarni 1 aprel, seshanba kuni Kiyevda Germaniya tashqi ishlar vaziri vazifasini bajaruvchi Annalena Berbok bilan bo‘lib o‘tgan matbuot anjumanida aytdi.
«Biz buning ustida ishlaymiz, muzokaralar olib boramiz. Tafsilotlarga kelsak, yangi kansler saylanganda va u yangi vazirlar mahkamasiga ega bo‘lganda, shundan keyingina bu savolga javob bera olaman», — dedi Zelenskiy. Nemis jurnalistining TAURUS yetkazib berilishidan umidvormi yoki yo‘qmi, degan aniq savoliga Ukraina prezidenti shunday javob berdi: «Ha, albatta. Umid qilyapman».
Berbok xuddi shu savolga yaqin kelajakda Tashqi ishlar vazirligi rahbari lavozimini tark etishini va shuning uchun bo‘lajak hukumatning qadamlari uchun javobgar bo‘la olmasligini aytdi. U Mersning ushbu mavzu bo‘yicha oldingi bayonotlariga e’tibor berishga chaqirdi.
Avvalroq Germaniyada bo‘lib o‘tgan parlament saylovlarida g‘alaba qozongan Xristian-demokratik va Xristian-sotsial ittifoqlari konservativ bloki yetakchisi Mers bir necha bor Ukrainaga TAURUS raketalarini yetkazib berish tarafdori bo‘lgan edi. U muxolifat yetakchisi sifatida Germaniya sotsial-demokratik partiyasidan kansler Olaf Sholsni Ukraina Qurolli kuchlariga ushbu turdagi qurollarni berishdan bosh tortgani uchun tanqid qildi.
