Yaponiya O‘zbekistonda farmatsevtika zavodi qurishni rejalashtiryapti

Joriy yilning 9 aprel kuni O‘zbekiston Investitsiyalar, sanoat va savdo vazirligida Yaponiyaning Sugi Holdings kompaniyasi prezidenti Katsunori Sugiura bilan uchrashuv bo‘lib o‘tdi.

Foto: Investitsiyalar, sanoat va savdo vazirligi

Sugi Holdings 1976 yilda tashkil topgan. Kompaniya farmatsevtika va tibbiyot kompaniyalari guruhini birlashtiradi. Yaponiyada u 2500 dan ortiq do‘kon va 14 ta yirik logistika markazlarini boshqaradi. Kompaniyaning aksiyalari Tokio va Osaka birjalarida joylashgan.

Uchrashuvda kompaniyaning yirik dorixonalar tarmoqlarini boshqarish, tibbiy profilaktika dasturlarini amalga oshirish, yapon tibbiyot mahsulotlarini yetkazib berish borasidagi tajribasidan foydalanish masalalari muhokama qilindi.

Katsunori Sugiura mamlakat ehtiyojlarini ta’minlash va qo‘shni davlatlar bozorlariga eksport qilish maqsadida O‘zbekistonda farmatsevtika zavodi qurish loyihasini amalga oshirishga to‘xtalib, strategik hamkorlikni yo‘lga qo‘yishdan manfaatdorligini bildirdi.

Tomonlar ISSV uchun alohida loyiha menejeri tayinlangan holda muhokama qilingan loyihalarni amalga oshirish bo‘yicha kelgusida hamkorlikda ishlash bo‘yicha kelishuvga erishdi.

Tayyorlagan: Отабек Матназаров

#Yaponiya #farmatsevtika