13 aprel tongida rossiyalik harbiylar Sumi shahri markazi bo‘ylab ikkita raketa zarbasi berdi.
Ukraina favqulodda vaziyatlar davlat xizmatining so‘nggi ma’lumotlariga ko‘ra, o‘qqa tutish oqibatida 34 kishi halok bo‘lgan, shundan ikki nafari bolalar. Yana kamida 117 kishi jarohatlangan. Yaralanganlar orasida — 17 nafar bola ham bor.
Hujum oqibatlari o‘rganilmoqda. Sumi oblasti harbiy ma’muriyati hujumdan keyin shahar markazida olingan foto va videolarni tarqatmoqda. Kadrlarda shaharda kamida bitta noturar joy binosi shikastlangani, bir necha mashina yonib ketgani ko‘ringan.
Bundan tashqari, mahalliy telegram-kanallarda joylashtirilgan videoda shahar ko‘chalaridan birida kuchli yong‘in bo‘layotgani aks etgan.
Ijtimoiy tarmoqlardagi roliklarda zarba oqibatida bitta trolleybus ham shikastlanganini ko‘rish mumkin.
BBC Ukraina xizmatiga ko‘ra, Sumi davlat universitetining Kongress-markazi zarba ostida qolgan, bu yerda ko‘pincha bolalar uchun mashg‘ulotlar o‘tkazilgan.
«Odamlar ko‘chaning qoq o‘rtasida, avtomobillarda, jamoat transportida ketayotganida, uyida o‘tirganida jarohat olgan. Politsiya zarba zonasiga kirishni cheklab qo‘ydi», – dedi Ukraina IIV rahbari Igor Klimenko. O‘qqa tutilgan joyda qutqaruv ishlari va hujum oqibatlarini bartaraf etish ishlari olib borilmoqda.
«Rossiya ballistikasining Sumiga dahshatli zarbasi. Dushman raketalari oddiy shahar ko‘chasiga, oddiy hayotga: uylarga, o‘quv yurtlariga, ko‘chadagi mashinalarga zarba berdi... Va bu odamlar cherkovga boradigan kunda, – deya izohladi Ukraina prezidenti Volodimir Zelenskiy. – Dastlabki ma’lumotlarga ko‘ra, gap tinch aholi vakillari orasidagi o‘nlab qurbonlar va yaradorlar haqida ketmoqda. Faqat ablahlargina shunday qilishi mumkin. Oddiy odamlarning hayotini olib».
