Fransiyada kriptomillionerlarni o‘g‘irlash ishi bo‘yicha 20 dan ortiq shaxs hibsga olindi

Parij va Nantda kriptotreyderlarning o‘g‘irlanishi bilan bog‘liq ish doirasida 20 dan ortiq odam hibsga olindi.

Tergovga aloqador AFP manbalarining qayd etishicha, qo‘lga olinganlarning olti nafariga 1 may kuni Parijda kriptovaluta ortidan boylik to‘plagan fuqaroni o‘g‘irlash ayblovi qo‘yilgan. O‘g‘rilar bir necha million yevro miqdorida pul talab qilgan. Jabrlanuvchi Parij yaqinidagi uyda ushlab turilgan. Xavfsizlik kuchlari tomonidan 3 may kuni o‘tkazilgan reydda ushbu fuqaro qutqarilgan.

13 may kuni jinoyatchilar Paymium kriptovaluta kompaniyasi ijro direktori Per Nuazning qizi va nabirasini o‘g‘irlashga uringan. O‘tkinchi kishi tufayli odam o‘g‘irlashga urinish muvaffaqiyatsiz tugagan. U hujum qilgan shaxslarga qarshi o‘t o‘chirgichdan foydalanib, qahramonlik ko‘rsatgan. Mazkur ish bo‘yicha qo‘lga olinganlarning aniq soni oshkor etilmayapti.

Ma’lumotlarga ko‘ra, 26 may kuni Nantda kriptovaluta sanoatiga bog‘liq yana bir odam o‘g‘irlash jinoyatining oldi olingan. Hozircha hodisa tafsilotlari ma’lum emas.