Xarkivda 7 iyul, dushanbaga o‘tar kechasi Rossiya dronining hujumi natijasida kamida 23 kishi jabrlandi, deb xabar bermoqda «Ukrainskaya pravda» nashri. Bir nechta dronlar ko‘p qavatli turar joy binolariga kelib tegdi. Shaharning Shevchenko tumanida 15 kishi, jumladan, ikki bola jarohatlangan. Xarkivning Slobodskiy tumanida yana 8 jabrlangan qayd etildi, ular orasida uch yoshli qiz ham bor, deb yozdi Xarkiv viloyati harbiy ma’muriyati (VHM) rahbari Oleg Sinegubov 7 iyul kuni ertalab Telegramʼdagi kanalida.
«Hozirda uch nafar jabrlanuvchi shifoxonalarga yetkazilgan, ulardan biri yosh bola», — dedi Sinegubov mahalliy vaqt bilan soat taxminan 7:40 da. Voqea joyida qutqaruv ishlari davom etmoqda.
VHM rahbarining so‘zlariga ko‘ra, Xarkivning Shevchenko tumanidagi ko‘p qavatli uylardan biriga Rossiya uchuvchisiz uchog‘i urilgani natijasida 8-qavatda yong‘in sodir bo‘lgan. Avvalroq Oleg Sinegubov xuddi shu hududda 9-qavatda yong‘in chiqqani haqida xabar bergan edi. Bu xuddi shu bino ekani aniqlashtirilmagan.
O‘z navbatida, Xarkiv meri Igor Terexov Telegram-kanalida Slobodskiy tumanida zarbalar turar joy hududiga yo‘naltirilganini aytdi. «Ikkinchi holatda ular fuqarolik obektini nishonga olgan», — deya qo‘shimcha qildi u.
