Isroil qo‘shinlari G‘azo sektorining markaziy qismidagi Dayr-al-Balah shahrida – 20 oydan ortiq harbiy harakatlar olib borilmagan hududda quruqlik va havo orqali yangi amaliyot boshladi.
Bu tinch aholi, jumladan, deyarli ikki yildan beri davom etayotgan mojaro tufayli ilgari o‘z uylarini tark etishga majbur bo‘lganlar orasida ko‘chishning yangi to‘lqinini keltirib chiqardi.
Amaliyot dushanba kuni erta tongda, Isroil harbiylari shaharning janubi-g‘arbiy qismidagi oltita turar joy mavzesi aholisini evakuatsiya qilishni buyurganidan bir necha soat o‘tib boshlandi.
Hozir bu hududda G‘azo janubidagi Rafah va Xon Yunusdan kelgan minglab qochqinlar bor.
Yakshanba kuni Isroil harbiylari Dayr-al-Balahning janubi-g‘arbidagi yuz minglab ko‘chirilgan g‘azoliklar boshpana topgan bir qancha tumanlar aholisiga uylarini tark etib, janubga yo‘l olishni buyurgan varaqalarni havodan tashlagandi.
Isroil armiyasi matbuot kotibi Avixay Adrai X ijtimoiy tarmog‘idagi xabarida Isroil Dayr-al-Balah atrofida, jumladan, «ilgari operatsiya o‘tkazilmagan hudud»da «o‘z faoliyatini kengaytirayotgani» haqida yozgan. U falastinliklarni «o‘z xavfsizligi uchun janubga, O‘rta Yer dengizi sohilidagi al-Mavosi hududiga ko‘chish»ga chaqirdi.
TSAHAL bayonotida aytilishicha, «Isroil mudofaa kuchlari dushman salohiyati va hududdagi terrorchilik infratuzilmasini yo‘q qilish uchun katta kuch bilan harakat qilishda davom etmoqda».
Mahalliy jurnalistlar BBC muxbiriga ma’lum qilishicha, Isroil tanklari va harbiy mashinalari artilleriya va aviatsiya niqobi ostida «Kisufim» nazorat-o‘tkazish punkti orqali shaharga kirgan.
Ularning xabarlariga ko‘ra, Isroil harbiylarining hujumiga artilleriya zarbalari hamrohlik qilgan. Ijtimoiy tarmoqlarda Isroil qo‘shinlarining oldinga siljishi fonida portlashlar va otishma ovozlari aks etgan videoyozuvlar paydo bo‘ldi.
Dushanbaga o‘tar kechasi G‘azo janubidagi nisbatan xavfsiz hududlardan biriga aylangan al-Mavosi tumaniga minglab kishilar qochib o‘tgan.
BBC’ning mintaqadagi muxbirlari xabar berishicha, evakuatsiya to‘g‘risida yakshanba kuni berilgan buyruq qochqinlar orasida katta vahimaga sabab bo‘lgan.
