Isroil JSST omboriga hujum qildi: Ğazoda ommaviy ölimlar xavfi kuçaymoqda

JSST ma’lum qilişiça, evakuatsiya zonasida joylaşgan taşkilotning asosiy ombori yakşanba kuni berilgan zarbada vayron bölgan, portlaş va yonğin yuz bergan. Şunga qaramay, taşkilot Deir al-Balahda qolişini va operatsiyalarini kengaytirişini bildirdi.

Duşanba kuni Isroil tanklari ilk bor Deir al-Balahning janubiy va şarqiy hududlariga kirib bordi. Isroil rasmiylariga köra, bu hududda garovga olinganlar bölişi mumkin. Hududga tanklardan berilgan zarbalar uylar va masjidlarga kelib tuşgan. Mahalliy soğliqni saqlaş idoralariga köra, kamida uç nafar falastinlik halok böldi, yana bir neçtasi jarohat oldi.

Deir al-Balah şahri 21 oydan buyon davom etayotgan uruşda boşqa hududlardan köçirib kelingan minglab falastinliklar bilan tölib-toşgan. Bu şahar Ğazodagi asosiy insonparvarlik markazi bölib qolayotgan edi. Ğazo soğliqni saqlaş rasmiylari yaqin kunlarda oçlikdan «ommaviy ölimlar» xavfi haqida ogohlantirmoqda.

JSST Ğazodagi soğliqni saqlaş tizimini «tizzasiga çökkan» holatda deb tasvirlamoqda — yoqilği, dori-darmon tanqisligi va Isroil hujumlaridan keyingi ommaviy jabrlanganlar oqimi bunga sabab bölmoqda.

«Ğazoda hayot tobora siqilmoqda, har bir ötgan kun insonlar hayotini saqlab qoliş imkoniyatini yanada kamaytirmoqda. Öq otişni töxtatiş – şunçaki zarur emas, balki allaqaçon keçikkan çora», deyiladi bayonotda.

Isroil mudofaa kuçlari (IDF) seşanba kuni bergan bayonotida, öz harbiylari Deir al-Balah hududida öqqa tutilgani va otişma boşlangan manzilga qarata javob zarbasi berganini ma’lum qildi.

«IDF faoliyati boşlanişidan avval fuqarolarni evakuatsiya qiliş haqida ogohlantirgan va mintaqada faoliyat yuritayotgan xalqaro taşkilotlar bilan aloqada bölgan», dedi IDF öz bayonotida JSSTni tilga olmasdan.

Şuningdek, Isroil tomoni bir neçta şaxs «terrorçilikda iştirok etganlikda gumon qilinib» qölga olingani va keyin qöyib yuborilganini tasdiqladi.

Xalqaro taşkilotlarning noroziligi

BMT matbuot kotibi Stefan Dyujarikning aytişiça, «BMT binolarining joylaşuvi barça tomonlarga oldindan ma’lum qilingan bölişiga qaramay, ikki mehmonxona nişonga olingan». U bu joylar — «evakuatsiya buyruqlariga qaramay, himoya qilinişi şart» ekanini ta’kidladi.

BMT rasmiylari Isroil öz ixtiyorida mavjud barça vositalar orqali insonparvar taşkilotlar tomonidan körsatilayotgan yordamni ötkazib yuboriş va ta’minlaş majburiyatiga ega ekanini eslatmoqda. Lekin Isroil bu çaqiriqlarga javob bermay keladi.

BMTning Humanitar masalalarni muvofiqlaştiriş boşqarmasi (OCHA) ma’lum qilişiça, Ğazodagi mahalliy rahbar Jonatan Uittal Deir al-Balahda qolişga qaror qilgan. Isroil esa uni «tarafkaşlik»da ayblab, vizasini avgustdan söng yangilamasligini bildirgan.

«Bu yerda ölim şaroitlari hukm surmoqda. Bu ölim va azob-uqubatlarning oldi olinişi mumkin edi. Agar ularni töxtatiş mumkin bölsa. Ammo baribir sodir bölayotgan bölsa, demak bu atayin amalga oşirilmoqda, deganidir», deya post qoldirgan Jonatan Uittal.

Birlaşgan Millatlar Taşkilotining Falastinlik qoçqinlarga yordam körsatiş agentligi – UNRWA ham X'da bergan bayonotida, Ğazodan, hatto öz xodimlaridan ham, oçlikdan ogohlantiruvçi umidsiz xabarlar kelayotganini bildirgan. U yerda oziq-ovqat narxlari keskin oşib ketgan.

«Bu orada, Ğazo taşqarisida joylaşgan omborlarda butun aholiga uç oylik oziq-ovqat yetarli hajmda zaxira qilinib turibdi. Qamalni tugating, yordamni xavfsiz va ommaviy tarzda kiriting», — deyiladi UNRWA bayonotida.

Duşanba kuni yigirmadan ortiq ğarbiy davlat Ğazodagi uruşni darhol töxtatişga çaqirib, u yerdagi azob-uqubatlar «misli körilmagan darajaga yetganini» bildirdi.

Isroil taşqi işlar vaziri Gideon Saar esa bu bayonotni qoralab, «xalqaro bosim ularga emas, aynan HAMASga qaratilişi kerak»ligini aytdi. AQŞ elçisi Mayk Xakabi esa bu qöşma murojaatni «jirkanç» deb atadi.