“Uch qahramon”dagi yong‘in: zarar salkam 6 mln dollarga baholandi, bozor faoliyati to‘xtatilishi mumkin

Toshkent viloyati va Toshkent tumani hokimlari, viloyat prokurori, IIBB va FVB boshliqlari “Uch qahramon” bozorida bo‘lib, yong‘indan jabr ko‘rganlar bilan suhbatlashdi. Savdogarlarga bo‘sh turgan do‘konlar ajratib berildi. Jinoyat ishi ustida 40 nafar tergovchi ishlayotgani aytildi. Bozor faoliyati 2026 yil 1 martdan to‘xtatilishi mumkin: bu yerda Toshkent metrosi uchun infratuzilma obekti qurilishi ko‘zda tutilgan.

{Yii::t(}

O'tkazib yuborish 6s

O'tkazib yuborish

13 avgust kuni Toshkent tumani hokimi Sardor Ergashev, 14 avgustda esa Toshkent viloyati hokimi Zoyir Mirzayev “Uch qahramon” bozoriga kelib, yong‘indan jabrlangan tadbirkorlar bilan muloqot qildi.

14 avgust kungi yig‘ilishda viloyat prokurori Azamat Mirzayev, viloyat IIBB boshlig‘i Abduvosit Abdurazzaqov, viloyat FVB boshlig‘i Abdualaziz Alimatov ham ishtirok etdi.

Yong‘indan jabr ko‘rgan savdogarlarga bozorning boshqa bir qismidagi foydalanilmay turgan do‘konlar ajratib beriladigan bo‘ldi.

Ularga kompensatsiya beriladimi-yo‘qmi, bu masala jinoyat ishi natijalariga ko‘ra hal bo‘ladi.

Kun.uz Toshkent viloyati hokimligidan olgan ma’lumotga ko‘ra, yong‘in oqibatida yetgan zarar miqdori dastlabki baholashda 74 mlrd so‘m (qariyb 5,9 mln dollar)ga baholangan.

“20 ming dollar tikkandim. Yongan do‘konimning o‘rniga ochiq joydan boshqa do‘kon beryapti. Svet yo‘q, qachon o‘tkazib berishadi, bilmadim”, deydi Kun.uz suhbatlashgan savdogarlardan biri.

“Tavakkal qilib kiryapmiz. Tikishga pulimiz yo‘q, realga “optomchi”larimizdan qarz ustiga qarz olib, mol olib kelamiz. Risk qilib ko‘rmoqchimiz. Endi tuzukroq sharoit ham yo‘q: odam o‘tadigan joylarni tekislab, beton qilib berishi kerak, tepani yopib berishi kerak. Eski joyimizda odam yaxshi bo‘lardi. Katta do‘konimiz bor edi. Hozir kichkina do‘kon berdi. Lekin uniyam egasi chiqib turibdi, o‘zimiz ishlatamiz dedi. Bilmadim. Bozor rahbarlari: ‘Sizlarga qanaqa bosim bo‘lsa, u odam biz bilan uchrashadi’ deb aytgan”, – deydi boshqa bir savdogar.

Tuman hokimi Sardor Ergashev 1 hafta ichida tadbirkorlarga zarur sharoitlar yaratib berilishini aytdi. Viloyat hokimi Zoyir Mirzayev 17 avgustdan bozor faoliyati tiklanishini ma’lum qildi.

“Men bozor faoliyati tiklangan kuni yana kelaman va har bir tadbirkor bilan yana muloqot qilaman. Bozor hududidagi tadbirkorlar orasidan vakillar tanlanadi va ular ishtirokida do‘konlar uchun joylash adolatli taqsimlash nazorat qilinadi”, – dedi Mirzayev.

Viloyat hokimligiga ko‘ra, yong‘indan zarar ko‘rgan tadbirkorlar soni – 137 nafar. Ulardan 125 nafariga 63 ta bo‘sh turgan do‘kon 2 oy muddatga ijara to‘lovisiz ajratib berilgan. 8 ta tadbirkor rad javobini berib, faoliyatini davom ettirmasligini ma’lum qilgan; yana 4 ta tadbirkordan esa murojaat kelib tushmagan.

Bozor kelasi yil yopiladimi?

Ma’lum bo‘lishicha, kelasi yil “Uch qahramon” bozori faoliyati to‘xtatilishi mumkin.

Viloyat hokimi Zoyir Mirzayevning tadbirkorlarga tushuntirishicha, bozorning kelgusi faoliyati xususida Toshkent metropoliteni qaror qabul qiladi.

Mirzayev bu borada metropoliten rahbari Rahmonbek Usmonov bilan telefon orqali gaplashganini aytdi. Unga ko‘ra, 2026 yil 1 martdan boshlab bu yerda metropoliten uchun zarur infrastruktura obekti qurilishini boshlash reja qilingan.

Gap shundaki, 6,5 gektarlik bozor hududi aslida Toshkent shahar hokimligining “Toshkent texnotrans logistik” unitar korxonasi (sobiq “Metropoliten kapital qurilish” UK)ga tegishli. Korxona 2024 yil 5 fevralda bozor hududiga kadastr hujjatlarini olgan. Bunga Toshkent viloyati hokimining 1993 yildagi qarori sabab bo‘lgan. O‘sha qaror bilan, Toshkent metropoliteniga Yunusobod liniyasining vagon deposini qurish uchun 6,5 gektar sug‘oriladigan yer maydoni “Metropoliten kapital qurilish” UKga ajratib berilgan. Keyinchalik, bu joy “Uch qahramon ixtisoslashgan savdo majmuasi” MChJga uzoq muddatga ijaraga berilgan.

MChJ o‘zi qurgan bino-inshootlarga nisbatan mulk huquqiga ega. Lekin yer maydoniga nisbatan ijara huquqi bekor qilingan taqdirda, bu qurilishlarga haq to‘lanmasligi va jamiyat ularni o‘z hisobidan buzishi belgilangan.

“Uch qahramon ixtisoslashgan savdo majmuasi” MChJning ta’sischilari – Jo‘rayev Latifxon Zunnunovich va Isamuhamedov Umrillo Zikrillayevich hisoblanadi.

Yong‘in sababi o‘rganilmoqda

“Uch qahramon” bozorida 11 avgustga o‘tar kechasi ro‘y bergan yong‘in do‘konlar joylashgan 2 gektarlik maydondan 0,8 gektarini qamrab oldi.

Yong‘inning sababi – bozorga kirilganda o‘ng tomondagi birinchi va ikkinchi do‘konlar orasidan o‘tgan elektr simlarida yuzaga kelgan avariya (ortiqcha yuklanish, yuqori o‘tish qarshiligi)dan deb taxmin qilinmoqda.

Yong‘in sababini aniqlash maqsadida sudga oid kompleks ekspertiza tayinlangan. Tergovni Toshkent viloyati IIBB Tergov boshqarmasi olib bormoqda.

Viloyat prokurori Azamat Mirzayevga ko‘ra, tergov jarayoniga 40 nafar tergovchidan iborat guruh jalb etilgan.