Xitoy kompaniyasi Toshkent-Samarqand yangi temiryo‘li qurilishida ishtirok etishga qiziqmoqda

Xitoyning Tianjin Rail Transit Group kompaniyasi Toshkent—Samarqand yangi temir yo‘l liniyasini barpo etish loyihasida ishtirok etishga qiziqish bildirdi. Bu haqda Transport vazirligi matbuot xizmati xabar berdi.

Xabarga ko‘ra, transport vaziri o‘rinbosari Jasurbek Choriyev Xitoyning Tianjin Rail Transit Group kompaniyasi bosh direktori o‘rinbosari Yunkan Ma bilan muzokaralar o‘tkazdi.

Uchrashuvda tomonlar metropoliten va temiryo‘l transportini rivojlantirish sohasidagi hamkorlik masalalarini muhokama qildi.

“Xitoy tomoni mavjud metro liniyalarini rekonstruksiya qilish va yangilarini qurish, shuningdek, Toshkent – Samarqand yangi temir yo‘l liniyasini barpo etish loyihasida ishtirok etishga qiziqish bildirdi. Kompaniya mazkur loyihalarni batafsil o‘rganish asosida o‘z takliflarini taqdim etishga tayyorligini ma’lum qildi”, deyiladi vazirlik xabarida.

Qayd etilishicha, Jasurbek Choriyev Xitoy—Qirg‘iziston—O‘zbekiston temiryo‘li va Transafg‘on koridorini qurish bo‘yicha yirik loyihalar haqida axborot berdi. Mazkur loyihalarni amalga oshirishni moliyalashtirish, ilg‘or texnologiyalar va innovatsion yechimlarni jalb etish borasida hamkorlikka qiziqish yuqori ekanini bildirdi.