Yaqin oylarda Yevropa Ittifoqi bilan Kengaytirilgan sheriklik va hamkorlik to‘g‘risidagi bitimni imzolaymiz - Shavkat Mirziyoyev

Tabrikda «o‘z mamlakatlarining ravnaqiga, xalqaro hamkorlik va o‘zaro ishonchni mustahkamlashga beqiyos hissa qo‘shib kelayotgan atoqli siyosatchilar va davlat arboblari, xalqaro tashkilotlar rahbarlaridan iborat nufuzli tarkibni Toshkentda, bir davrada to‘plash borasidagi tashabbusi uchun» Nizomiy Ganjaviy nomidagi xalqaro markazga chuqur minnatdorlik bildirilgan.

Shuningdek, O‘zbekiston prezidenti Nizomiy Ganjaviy nomidagi markazning xalqaro kun tartibidagi masalalarni o‘rganishdagi faol ishtiroki alohida e’tiborga loyiqligini qayd etgan.

«Uning shafeligida har yili o‘tkazib kelinayotgan Global Boku forumi xalqaro va mintaqaviy taraqqiyotning eng dolzarb muammolarini hal etish uchun yangi g‘oyalar ilgari suriladigan, dunyo miqyosida tan olingan nufuzli muloqot maydonlaridan biriga aylandi», deyiladi tabrikda.

Ta’kidlanishicha, so‘nggi yillarda Ozarbayjon bilan o‘zaro ishonch va bir-birini qo‘llab-quvvatlash ruhidagi munosabatlar faol rivojlanmoqda, Ittifoqchilik munosabatlari to‘g‘risidagi shartnoma imzolandi, Davlatlararo oliy kengash faoliyat ko‘rsatmoqda.

«Shu bilan birga, Ozarbayjon Markaziy Osiyo va Yevropani bog‘lashda strategik ko‘prik vazifasini bajarib kelayotganini ham alohida qayd etishni istar edim.

Bugungi forumda ko‘plab vakillari ishtirok etayotgan Yevropa bilan munosabatlarimiz o‘zining mutlaqo yangi rivojlanish davrini boshidan kechirayotganini qayd etmoqchiman.

Yaqinda biz yurtimizda ilk bor «Markaziy Osiyo – Yevropa Ittifoqi» sammitini o‘tkazdik. Unda mintaqamiz va Yevropa Ittifoqi mamlakatlari o‘rtasida strategik sheriklik o‘rnatish to‘g‘risida tarixiy qaror qabul qilindi. Yaqin oylarda Yevropa Ittifoqi bilan Kengaytirilgan sheriklik va hamkorlik to‘g‘risidagi bitimni imzolaymiz.

Biz Yevropa Ittifoqi va boshqa sheriklarimiz bilan birgalikda samarali transport-logistika va energetika yo‘laklarini rivojlantirish bo‘yicha aniq maqsadga yo‘naltirilgan ishlarni davom ettiramiz. Ishonamizki, ushbu chora-tadbirlar mintaqamizning G‘arb va Sharq o‘rtasidagi xab sifatidagi rolini qayta tiklash imkonini beradi», deyiladi prezident tabrigida.