O‘zbekistonda yengil avtomobillarni sotuvchi rasmiy dilerlar ro‘yxati tasdiqlandi

M1 toifasidagi avtotransport vositalarining ishlab chiqaruvchilari yoki ularning rasmiy dilerlari hisoblangan 19 ta kompaniya ro‘yxati e’lon qilindi. Texnik jihatdan tartibga solish agentligiga ko‘ra, bundan asosiy maqsad fuqarolarga qulaylik yaratish va firibgarlik holatlarining oldini olish. O‘z navbatida, maskur ro‘yxatga kiritilmagan avtosalonlar faoliyatiga nisbatan cheklovlar joriy qilish rejalashtirilmagan.

Foto: Prezident matbuot xizmati

Texnik jihatdan tartibga solish agentligi O‘zbekistonda muvofiqligi tasdiqlangan, rasmiy dilerlar tomonidan muomalaga chiqarilayotgan (sotilayotgan) transport vositalarining ro‘yxatini e’lon qildi.

Qayd etilishicha, 19 ta kompaniya M1 toifasidagi avtotransport vositalarining ishlab chiqaruvchilari yoki ularning rasmiy dilerlari hisoblanadi.

Texnik jihatdan tartibga solish agentligi matbuot xizmatining Kun.uz’ga qo‘shimcha izoh berishicha, yuqoridagi ro‘yxatni tuzishdan asosiy maqsad fuqarolarga qulaylik yaratish va firibgarlik holatlarining oldini olish hisoblanadi. O‘z navbatida, maskur ro‘yxatga kiritilmagan avtosalonlar faoliyatiga nisbatan cheklovlar joriy qilish yoki ularning ishini to‘xtatish rejalashtirilmagan. Ro‘yxatda mavjud kompaniyalardan moshina xarid qilinganda Piskentdagi poligondan sertifikat olish shart emas, qolgan holatlarda esa bu talab bajarilishi kerak.

Muallif: Достон Аҳроров

#transport #avtomobil