FT: Urushdan keyin AQSh Kiyevni havo mudofaasi va razvedka sohasida qo‘llab-quvvatlaydi

Urush tugaganidan keyin Ukraina uchun g‘arb xavfsizlik kafolatlarini ta’minlashga qo‘shgan hissasi sifatida Qo‘shma Shtatlar mamlakatga Amerika qo‘shinlarini yubormasdan razvedka va havo mudofaasi sohasida hamkorlik qilishga tayyor. Bu haqda Financial Times gazetasi nomi oshkor etilmagan Yevropa va Ukraina rasmiylariga tayanib xabar berdi.

O‘tgan hafta AQSh prezidenti Donald Tramp Yevropa yetakchilariga uning mamlakati Ukraina uchun xavfsizlik kafolatlarini ta’minlash bo‘yicha sa’y-harakatlarni muvofiqlashtirishga yordam berishga tayyorligini aytdi. O‘shandan beri AQShning yuqori martabali rasmiylari yevropalik hamkorlar bilan bo‘lgan ko‘plab suhbatlarida Vashington «strategik imkoniyatlar»ni, jumladan, Yevropa boshchiligidagi har qanday kuchlarni yerga joylashtirish uchun kuzatuv va razvedka, qo‘mondonlik va havo hujumidan mudofaa imkoniyatlarini taqdim etishga tayyorligini ta’kidladi, dedi munozaralardan xabardor to‘rt manba.

Ayni paytda, Yevropa rasmiylari shaxsiy suhbatlarda Ukrainaga har qanday harbiy kuchlarni joylashtirish faqat AQSh ko‘magida amalga oshirilishi mumkinligini tan oldi, deb yozadi nashr. Vashington allaqachon Kiyevni Patriot havo hujumidan mudofaa tizimlari bilan ta’minlab kelmoqda, biroq urushdan keyin Ukrainaga ko‘mak AQSh samolyotlari, logistika va yerusti radar tizimlarini o‘z ichiga oladi, bu esa Yevropa kuchlariga osmonni yopish va Ukraina uchun havo qalqoni yaratishga yordam beradi, deya o‘z suhbatdoshlaridan iqtibos keltirmoqda jurnalistlar.