Abu Ubayda ham Isroil zarbasi oqibatida halok bo‘ldi

Isroil mudofaa vaziri Israel Kats Isroil armiyasi va razvedkasini «benuqson» operatsiya bilan tabrikladi. U tadbir qachon va qayerda o‘tkazilgani haqida batafsil ma’lumot bermagan, biroq Isroil mudofaa kuchlari avvalroq o‘z samolyotlari shanba kuni G‘azo shahrining Al-Rimal tumanida «asosiy terrorchi»ga hujum qilganini ma’lum qilgan, shundan so‘ng OAV nishon Ubayda bo‘lgani haqida xabar bergan.

Hamas uning o‘limini rasman tasdiqlamadi, biroq Isroilning G‘azo shahridagi turar joy binosiga bergan zarbalari oqibatida o‘nlab tinch aholi vakillari halok bo‘lgani va yaralanganini ma’lum qildi.

Yakshanba kuni Kats Ubaydaning boshqa ko‘plab «jinoiy sheriklari» «G‘azodagi kampaniyaning kuchayishi» munosabati bilan nishonga olinishi haqida ogohlantirdi, bu Isroil tomonidan G‘azo shahrini egallash rejasini nazarda tutadi.

TSAHAL va Isroilning Shin-Bet maxsus xizmati Abu Ubayda nishonga olingan shanba kungi zarbalar haqida batafsilroq ma’lumot berdi.

Qo‘shma bayonotda ular operatsiya «Ubaydaning yashiringan joyini aniqlagan [Shin-Bet] va TSAHAL razvedka boshqarmasi tomonidan to‘plangan razvedka ma’lumotlari sharofati bilan o‘tkazilgani»ni aytishdi.

Beshta raketa bir vaqtning o‘zida ikki xil yo‘nalishdan olti qavatli turar joy binosining ikkinchi va uchinchi qavatlariga uchib borgan.

Hujumga uchragan kvartiradan stomatologiya xonasi sifatida foydalanilgan. Guvohlar zarba natijasida havoga yuz minglab dollarlik banknotlar sochilib ketganini aytishgan. Xabar qilinishicha, katta miqdordagi pullar atrofdagi aholi tomonidan talon-toroj qilingan, biroq keyinchalik Hamas pullarni qaytarib olgan.

Abu Ubayda taxallusi bilan mashhur bo‘lgan Hutayf al-Kahlutning o‘ldirilishi guruh uchun jiddiy ramziy zarba hisoblanadi.

Doim yuzini niqoblagan holda ko‘rinish bergan, Isroil va okkupatsiyaga qarshi chiqishlari bilan tanilgan Abu Ubayda Hamas harbiy qanotining G‘azoda omon qolgan so‘nggi mashhur shaxslaridan biri va butun Yaqin Sharq bo‘ylab Hamas tarafdorlarining kumiri edi.

Isroil mudofaa armiyasi va Shin-Betning qo‘shma bayonotida ham Ubayda «Hamas terrorchilik tashkilotining taniqli shaxsi bo‘lgani» va «Hamas tashviqoti bilan shug‘ullangani» aytilgan.

Taxminan 40 yoshlarda bo‘lgan Abu Ubayda juma kuni so‘nggi nutqida garovga olingan qolgan isroilliklarning taqdiri Hamas jangchilari taqdiri bilan bir xil bo‘lishini aytgan va Isroilni G‘azo shahriga rejalashtirilgan bosqin oqibatlaridan ogohlantirdi.

Shanba kuni Hamas TSAHALni G‘azo shahrining aholi zich joylashgan Al-Rimal tumanidagi turar joy binosiga zarba berishda aybladi.

Mahalliy jurnalistlar xabar berishicha, zarba oqibatida kamida yetti kishi halok bo‘lgan, 20 kishi, jumladan, bolalar jarohatlangan.

TSAHALning ta’kidlashicha, hujumdan oldin «tinch aholiga zarar yetkazish ehtimolini kamaytirish uchun bir qator choralar ko‘rilgan, jumladan, yuqori aniqlikdagi qurollardan foydalanish, havo kuzatuvi va qo‘shimcha razvedka ma’lumotlari».

Avgust oyi boshida Isroil Vazirlar Mahkamasi 22 oylik urushni yakunlash maqsadida yangi hujum davomida G‘azo shahri ustidan nazoratni qo‘lga olish rejasini ma’qullagandi.

Isroilning G‘azo sektoridagi harbiy amaliyoti 7 oktyabr kuni Hamas tomonidan uyushtirilgan hujumga (bu hujum oqibatida 1200 ga yaqin odam halok bo‘lgan, 251 kishi garovga olingan) javoban boshlangandi. O‘shandan beri, G‘azodagi sog‘liqni saqlash vazirligi ma’lumotlariga ko‘ra, 63 mingdan ortiq falastinlik halok bo‘lgan.

G‘azo shahrini egallash operatsiyasi hali to‘liq boshlanmagan bo‘lsa-da, Isroilning bir millionga yaqin aholisi bo‘lgan shaharga hujumlari davom etmoqda.

Isroil harbiylari qo‘shin kiritilgunga qadar G‘azo shahrining barcha aholisini evakuatsiya qilish va janubdagi boshpanalarga ko‘chirishni rejalashtirayotganini aytdi.

Hisob-kitoblarga ko‘ra, shahardagi uylarning 90 foizdan ortig‘i shikastlangan yoki vayron bo‘lgan, sog‘liqni saqlash, suv ta’minoti, sanitariya va gigiyena tizimlari ishdan chiqqan.

O‘tgan hafta G‘azo shahri va uning atrofida ocharchilik mavjudligi birinchi marta tasdiqlandi.

G‘azo shahrini egallash operatsiyasi hali to‘liq boshlanmagan bo‘lsa-da, Isroilning bir millionga yaqin aholisi bo‘lgan shaharga hujumlari davom etmoqda.

Isroil harbiylari qo‘shin kiritilgunga qadar G‘azo shahrining barcha aholisini evakuatsiya qilish va janubdagi boshpanalarga ko‘chirishni rejalashtirayotganini aytishgan.

Hisob-kitoblarga ko‘ra, shahardagi uylarning 90 foizdan ortig‘i shikastlangan yoki vayron bo‘lgan, sog‘liqni saqlash, suv ta’minoti, sanitariya va gigiyena tizimlari ishdan chiqqan.

O‘tgan hafta G‘azo shahri va uning atrofida ocharchilik mavjudligi birinchi marta tasdiqlandi.