O‘zbekistonda odamlar eng ko‘p kvartira va mashina xaridida aldanishadi. Endilikda bu ro‘yxatga baliq va dengiz mahsulotlaridan tayyorlangan taomlar ham qo‘shildi: dengizdan ancha olisda joylashgan O‘zbekiston aholisi dengiz mahsulotlari yetkazib berish bilan chuv tushirilmoqda.
Bu maqsad uchun ijtimoiy tarmoqlarda, xususan, Facebook va Telegram’da o‘nlab kanal va guruhlar tashkil etilib, ishtahani ochuvchi reklamalar faol joylashtirib borilyapti. Shulardan biri Telegram’dagi “Rybka | Magazin Moreproduktov” kanali hisoblanadi.
Ushbu kanalda dengiz mahsulotlari, baliqdan tayyorlangan turli taomlar va ikralar reklamasi joylashtirib borilmoqda. Biroq bu mahsulotlar shunchaki “xo‘rak”, xarid qilmoqchi bo‘lganlar osongina “qarmoqqa ilinadi” va pulidan ayriladi.
Kun.uz jurnalisti mijoz sifatida kanalda ko‘rsatilgan menejerga narxi 1 mln so‘mlik baliqli assorti buyurtma qilib ko‘rdi.
Oleg ismli menejer avvaliga ular to‘lovni to‘liq amalga oshirish asosida ishlashini, agar mahsulot yoqmasa to‘langan pul qaytarib berilishini, buyurtma bilan birga do‘kondagi mahsulotlar uchun sifat sertifikati hamda kafolat taqdim etilishini bildirdi. Shu bilan bir qatorda buyurtmani amalga oshirish uchun shaxsiy ma’lumotlar, xususan, to‘liq ism-familiya (bu nega kerakligi tushunarsiz) so‘raldi.
“Singlim shifoxonada edi. Uni ko‘rishga bormoqchi bo‘ldim va ushbu kanaldan 1,1 mln so‘mlik baliqli assorti buyurtma qildim. Yarim soatda yetkazib berilishini ma’lum qilishdi. Kuta boshladim: 2 soat o‘tdi hamki, buyurtmadan darak yo‘q. Menejyerga buyurtma qachon kelishi haqida yozgandim, darhol bloklab qo‘ydi”, deydi ushbu firibgarlarga chuv tushgan fuqarolardan biri.
Menejyer to‘lovni amalga oshirish uchun Fazliddin Ziyodullayev ismli shaxs nomidagi bank kartasini taqdim qilgan. Mijoz unga 1,1 mln so‘m pul mablag‘ini ko‘chirgan. Biroq buyurtma qilingan baliq kelmagan, mijoz esa bloklab qo‘yilgan.
Ayni shu kabi faoliyat olib boruvchi “Rybnyy ekspress” kanali ham shubhali.
