AQSh BMT XKning G‘azo bo‘yicha rezolyutsiyasiga yana veto qo‘ydi

Qo‘shma Shtatlar G‘azo sektorida «zudlik bilan, so‘zsiz va doimiy» o‘t ochishni to‘xtatishni, shuningdek, Isroilning Falastin hududiga gumanitar yordam yetkazilishiga qo‘ygan barcha cheklovlarini olib tashlashni talab qiladigan Birlashgan Millatlar Tashkiloti (BMT) Xavfsizlik kengashi rezolyutsiyasi loyihasiga veto qo‘ydi. Bu haqda Reuters agentligi 18 sentabr, payshanba kuni xabar berib, Vashington bunday hujjatga oltinchi marta veto qo‘yganini qo‘shimcha qildi.

«Qo‘shma Shtatlar ushbu qabul qilib bo‘lmaydigan rezolyutsiyani rad etadi. HAMAS uchun barcha garovga olinganlarni istisnosiz zudlik bilan ozod qilish va so‘zsiz taslim bo‘lish vaqti keldi. Qo‘shma Shtatlar bu dahshatli mojaroga barham berish uchun o‘z hamkorlari bilan ishlashda davom etadi», — dedi AQShning BMTdagi doimiy vakili Morgan Ortagus Donald Tramp ma’muriyati qarorini oqlab.

Rezolyutsiya loyihasi BMT Xavfsizlik kengashining 15 a’zosidan o‘ntasi tomonidan tayyorlangan. Qolgan 14 mamlakat, AQShdan farqli o‘laroq, Isroilning HAMAS bilan deyarli ikki yillik urushidan so‘ng BMTning G‘azo sektorida ocharchilik haqida rasmiy e’loniga javoban avgust oyida hujjatni qo‘llab-quvvatladi. Avvalroq, 2024 yil fevralida o‘tkazilgan uchinchi ovoz berishda BMT oliy organining faqat bitta doimiy a’zosi – Buyuk Britaniya betaraf qolgan edi.