Hindistonda siyosatchi va aktyor Vidjay o‘tkazgan miting vaqtida o‘nlab kishilar halok bo‘ldi

Shanba kuni Karur okrugida aktyor va siyosatchi Vidjayning saylovoldi tadbiriga o‘n minglab odamlar yig‘ilgan.

Mahalliy OAV xabariga ko‘ra, tadbir bir necha soatga kechiktirilgan. Televizion kadrlarda olomon ichida hushini yo‘qotayotgan odamlarni ko‘rish mumkin.

Mahalliy shifoxona yonida jurnalistlarga ma’lumot bergan siyosatchi Sentil Balaji halok bo‘lganlar sonini tasdiqladi va 50 dan ortiq kishi jarohatlanganini ma’lum qildi.

Shtat sog‘liqni saqlash vaziri Ma Subramanianning mahalliy OAVga ma’lum qilishicha, halok bo‘lganlar orasida kamida 16 nafar ayol, to‘qqiz nafar erkak va olti nafar bola bor.

Tamilnad shtati hukumati rahbari Mutxuvel Karunanidxi Stalinning aytishicha, ba’zi odamlar tiqilinchda hushidan ketganidan keyin shifoxonaga yetkazilgan, rasmiylar qo‘shni hududlardagi shifokorlarni yordam uchun chaqirgan.

Shuningdek, u halok bo‘lganlarning oila a’zolariga bir million rupiy (11300 AQSh dollari) miqdorida tovon puli to‘lanishi va hodisa yuzasidan tekshiruv o‘tkazilishini ma’lum qildi.

Internetda e’lon qilingan bayonotida Vidjay «qalbi chilparchin bo‘lgani» va «chidab bo‘lmas, ta’riflab bo‘lmas og‘riq va qayg‘u»ni boshdan kechirayotganini aytdi.

U halok bo‘lganlarning oila a’zolariga «chuqur hamdardlik» bildirib, shifoxonada yotganlarning «tezroq sog‘ayib ketishi»ni tilagan.

Hindiston bosh vaziri Narendra Modi X platformasidagi postda sodir bo‘lgan voqeani «qayg‘uli baxtsiz hodisa» deb atadi.

Hindistonda olomon orasida tiqilinchlar kamyob hodisa emas, shu yilning o‘zida bir nechta shunga o‘xshash fojialar sodir bo‘ldi, mashhur Kumbx Mela festivalidagi tiqilinch hamda «Royal Challengers» nomli mahalliy kriket jamoasining g‘alabasini nishonlash paytida stadionning kirish qismida ro‘y bergan tiqilinch shular jumlasidan.