Kreml YeIning Rossiya muzlatilgan aktivlaridan foydalanish rejasiga javob qaytardi

Kreml Yevropa komissiyasining Ukrainani muzlatilgan Rossiya aktivlari hisobidan moliyalashtirish bo‘yicha rejalariga izoh berdi. Bu haqda 1 oktyabr, chorshanba kuni Rossiya prezidenti matbuot kotibi Dmitriy Peskov bayonot bilan chiqdi.

«Gap Rossiya mulkini noqonuniy ravishda tortib olish yoki ruscha aytganda, o‘g‘rilik rejalari haqida ketmoqda», — dedi Peskov.

Agar kimdir «bizning aktivlarimizni» «noqonuniy ravishda o‘zlashtirmoqchi» yoki ulardan «dividendlar olish»ni istasa, «bu yoki boshqa tarzda bunga aloqador bo‘lganlar jinoiy ta’qib qilinadi», deya uning so‘zlaridan iqtibos keltirgan «Interfaks».

Kreml matbuot kotibi «nafaqat shaxslar, balki davlatlar» ham javobgarlikka tortilishini aytdi. «Bu, albatta, javobsiz qolishi mumkin emas», — deya qo‘shimcha qildi Peskov.

Avvalroq, 1 oktyabr kuni Yevrokomissiya (YeK) raisi Ursula fon der Lyayyen Kiyevga Rossiyaning muzlatilgan aktivlari garovi ostida milliardlab yevro kreditlar ajratish tashabbusini qo‘llab-quvvatlashga chaqirgan edi.