Yil boshidan buyon 4 mingdan ortiq Rossiya fuqarosiga O‘zbekistonda ishlash huquqi berilgan

Toshkentda “O‘zbekiston – Rossiya mehnat bozorini barpo etish” forumi bo‘lib o‘tdi.

Forum doirasida Migratsiya agentligi direktori Behzod Musayev Rossiyada mehnat qilayotgan o‘zbekistonliklar huquq va manfaatlarini himoya qilish, ularning ish faoliyati davomida erkin harakatlanishi, ishlash ruxsatnomalarini olishdagi murakkab jarayonlarni soddalashtirish masalalarini alohida ta’kidladi.

Behzod Musayev “O‘zbekiston 24” telekanaliga bergan intervyusida xorijdan O‘zbekistonga ishlash yoki boshqa maqsadlarga kelganlarga kerakli sharoitlar yaratilayotganini aytdi.

“Joriy yil boshidan 400 mingdan ortiq Rossiya fuqarolari O‘zbekiston hududida ro‘yxatdan o‘tgan. Ularning 4 mingdan ortig‘iga O‘zbekistonda ishlash huquqi berilgan. Qaysi mamlakatdan kelishidan qat’i nazar, O‘zbekistonga tashrif buyurgan sayyoh bo‘ladimi, mehmonmi yoki ishlash orzusidagi insonmi, bemalol o‘rnatilgan tartibda ro‘yxatdan o‘tishi mumkin. Ularga albatta kerakli sharoitlar yaratiladi”, dedi u.