Ukraina prezidenti Volodimir Zelenskiy Rossiya Yevropaning istalgan nuqtasida dronlardan foydalanishi mumkinligi haqida ogohlantirdi. «Agar ruslar Polshaga qarshi uchuvchisiz uchoqlardan foydalanishga yoki Shimoliy Yevropa davlatlari havo hududini buzishga jur’at etsa, bu har qanday joyda – G‘arbiy Yevropada, janubda sodir bo‘lishi mumkin», dedi u 2 oktyabr, payshanba kuni Kopenhagenda bo‘lib o‘tgan Yevropa siyosiy hamjamiyatining yig‘ilishida.
Zelenskiy uchuvchisiz uchoqlarga qarshi tura oladigan «tezkor va samarali javob va mudofaa kuchlarini» yaratish zarurligini ta’kidladi. Uning ta’kidlashicha, Ukraina Rossiya bilan urushi tufayli dron hujumlariga qarshi kurashda «ehtimol dunyodagi eng katta tajribaga ega» va buni Daniya bilan baham ko‘rishga tayyor.
Kopenhagendagi Yevropa siyosiy hamjamiyati sammiti oldidan noma’lum dronlarning Daniya aeroportlari va harbiy obektlari ustidan ko‘p sonli parvozlari keng xavotirga sabab bo‘ldi. Garchi bu dronlarning kelib chiqishi hali aniqlanmagan bo‘lsa-da, Yevropaning bir qancha hukumatlari Rossiya ishtirokini gumon qilmoqda. Moskva ayblovlarni rad etdi.
So‘nggi haftalarda NATO davlatlari Polsha, Estoniya va Ruminiya ham o‘z havo kengliklari Rossiya uchuvchisiz uchoqlari va harbiy samolyotlari tomonidan buzilgani haqida xabar berdi.
