Kun.uz'ning jonli efirdagi “Geosiyosat” dasturida siyosiy tahlilchilar Rossiya–Ukraina urushining borishidagi so‘nggi tendensiyalar yuzasidan munozaraga kirishdi.
Anvar Yo‘ldoshev: Hozir front chizig‘i taxminan 1 200 kilometrga cho‘zilgan va ikkala tomondan ham hujumlar davom etmoqda. Ayrim hududlarda Ukraina Rossiya egallab olgan hududlarini qaytarib olishga urinyapti. Rossiya esa Xarkov tomonida oldinga yurishga intilyapti. Umuman olganda, katta siljishlar yo‘q, front nisbatan barqaror qolmoqda.
Har ikki tomon ham yutuqlarni da’vo qilyapti. Rossiya ba’zi hududlarni egallaganini, Ukraina esa Donbass va boshqa joylarda kichik qishloqlarni qaytarib olganini bildiradi. Hozirgi holatni umumlashtirib aytganda, 2025 yilda Rossiyaning hozirgacha egallagan maydoni taxminan 4 900–5 000 kvadrat kilometr atrofida ekan, biroq ba’zi joylarda ular hududlarni qaytarishga majbur bo‘lgan.
Shuhrat Rasul: Xalqaro urushni o‘rganayotgan tashkilotlar va Ukraina iddaolariga ko‘ra, 2022 yil noyabridan hozirgacha Rossiya Ukrainadan taxminan 5 842 kvadrat kilometr hududni qo‘shimcha ravishda egallagan. Bu Ukraina umumiy maydonining 0,97 foiziga teng. Bu haqda hatto prezident Putin ham bayonot berdi.
Endi urush paritetli va simmetrik shaklga kirdi. Bu degani, teng urush ketyapti. Avval urush asosan Ukraina hududiga zarba berish shaklida bir tomonlama ketayotgan edi, hozir esa ikkala tomondan ham bir-biriga teng javob berish imkoniyati paydo bo‘lmoqda. Ukraina ham Rossiyaga nisbatan teng darajada zarba berish imkoniyatiga ega bo‘lyapti. Ukrainaning uzoq masofaga uchuvchi dronlari hamda raketalari soni va imkoniyatlari kundan kunga oshmoqda.
Bu faqatgina AQSh berishi kutilayotgan “Tomahawk” raketalari masalasi emas, hamkorlar tomonidan boshqa turdagi harbiy yordam ham yuborilyapti. Bu qurollarning yetkazilishi Ukraina tomoniga sifat jihatidan Rossiyaga nisbatan teng kurashish imkonini beradi, ya’ni urush paritetli va simmetrik xarakter kasb etmoqda.
Urush davomida Rossiya Ukrainadagi kommunikatsiya markazlari, energetika infratuzilmasi va iqtisodiy obektlarga zarba berib, katta zarar yetkazgan edi, endilikda Ukraina ham shunga munosib javob bera olish kuchiga ega bo‘lyapti. Misol tariqasida, hozirda Ukraina o‘zida mavjud dronlardan foydalanib, Rossiyaning ayrim neft korxonalariga jiddiy zarba berganini qayd etish mumkin. Bu imkoniyatlar va zarbalarning kuchi keyingi davrlarda yanada oshishi kutilmoqda. Natijada agar urush davom etsa, faqat Rossiyaning hujumlariga asoslangan faza ortda qolib, raqobat va o‘zaro zarbalar bilan xarakterlangan yangi bosqich, ya’ni qisman paritetli va simmetrik urush bosqichi kuchayishi ehtimoldan yiroq emas.
