KXDRda Ukraina urushida halok bo‘lgan harbiylar xotirasiga memorial barpo etilmoqda

KXDR rahbari Kim Chen In Pxenyandagi tadbirni Rossiya bilan munosabatlarning «tarixiy cho‘qqisi» deb atadi va «Pxenyan doimo Moskva tomonida bo‘lishini» ta’kidladi. Uning so‘zlariga ko‘ra, «jangovar jasoratlar muzeyi» «haqiqiy vatanparvarlarning abadiy xotirasiga bag‘ishlangan muqaddas maskan» bo‘ladi.

Memorial tarkibida Rossiya hududidagi janglarda ishtirok etgan shimoliy koreyalik askarlarning haykallari, shuningdek ularning jasoratlariga bag‘ishlangan suratlar va badiiy ishlar namoyish etiladi.

Kim Chen In va Rossiya prezidenti Vladimir Putin o‘zaro mudofaa to‘g‘risidagi shartnomani imzolagan bo‘lib, u KXDR tomonidan 2024 yil noyabrida ratifikatsiya qilingan. Bitim tomonlardan biriga tajovuz qilinsa, «zarur bo‘lgan barcha vositalar» bilan darhol harbiy yordam ko‘rsatish majburiyatini nazarda tutadi.

2025 yil aprelida Shimoliy Koreya rasman o‘z askarlarini Rossiyaga yuborganini tasdiqladi, bu haqdagi mish-mishlar ancha oldin tarqalgan edi. Ukraina ma’lumotlariga ko‘ra, jangovar hududga muhandislar va ishchilarni ham o‘z ichiga olgan 14 mingdan ko‘p shimoliy koreyalik harbiy yo‘llangan.

Janubiy Koreya razvedkasi sentabr oyida keltirgan bahoga ko‘ra, Ukraina bilan chegaradosh Rossiyaning Kursk viloyatida kamida 2 ming shimoliy koreyalik askar halok bo‘lgan. Bu ko‘rsatkich aprel oyida xabar qilingan taxminan 600 nafardan ancha yuqori. Yaralanganlar soni esa bundan ancha ko‘p deb baholanmoqda.

KMTAning ta’kidlashicha, memorial poydevorini qo‘yish marosimida Rossiyaning KXDRdagi elchisi va elchixona xodimlari ham ishtirok etdi.