“Energoatom”dagi korrupsiya mojarosi - Kiyev uchun sinov

Sovsun fikricha, “Energoatom”dagi korrupsiya sxemasi “yuqori kabinetlar”siz amal qilishi mumkin emas edi, shuning uchun harbiy vaqtdagi tizimli korrupsiya uchun faqat ijrochilar emas, barcha benefitsiarlar ham javob berishi kerak. «Yuqorida o‘tirganlar. Umid qilamanki, huquqni muhofaza qiluvchi organlar ularning aloqadorligini isbotlay oladi. Chunki urush paytida, inson hayoti xavf ostida qolgan bir vaziyatda kimdir faqat “otkatlar”ni hisoblagan bo‘lsa — jamiyat sabri tugagan», — dedi u.

“Golos” deputati Yaroslav Jyeleznyak Galushchenko va Grinchukni bo‘shatish tashabbusi bilan chiqib, tegishli arizalarni Radaga kiritdi. “Yevropeyskaya solidarnost” muxolif partiyasi esa butun hukumatni iste’foga chiqarish jarayonini boshlayotganini bildirdi. “Yevropeyskaya solidarnost” bugungi voqealar — davlatga xiyonat darajasiga teng — ular yuzasidan prezidentdan aniq va samarali reaksiya talab qiladi. Aks holda, biz sheriklar ishonchini, xalqaro qo‘llab-quvvatlashni yo‘qotamiz, ularsiz Ukraina umidsiz”, — deyiladi partiya bayonotida.

Transparency International Ukraina ijrochi direktori o‘rinbosari (yuridik masalalar) Yekaterina Rijyenko DW’ga bergan intervyusida xalqaro va ichki ishonchni yo‘qotish xavfi haqida gapirdi. Uning ta’kidlashicha, energetikada — yuqori mansabdorlar ishtirokida yana bir korrupsiya sxemasining fosh etilishi Ukraina tomonidan energetika tizimini himoya qilishga yordam so‘ralayotgan bir paytda uzoq muddatli oqibatlarga olib keladi.

«Mudofaa va energetika xaridlaridagi navbatdagi korrupsiya mojarosi bizga korrupsiyaga qarshi samarali kurashayotgan mamlakat obrazini mustahkamlashga yordam bermaydi. Sxema ko‘lamini hisobga olganda, u vakuumda ishlaganini tasavvur qilish qiyin — siyosiy rahbariyat, prezident va maslahatchilari bilmagan bo‘lsa, nima uchun bilmagan?» — dedi Rijyenko.

U, shuningdek, yoz mavsumida hokimiyatning NABU va SAP mustaqilligini cheklashga urinishi bilan “Midas” natijalari o‘rtasida bog‘liqlikni ko‘rdi. «O‘shanda bu ish NABU va SAP tomonidan allaqachon tergov qilinayotgan edi va, menimcha, antikorrupsiya organlari mustaqilligini buzishga urinish — figurantlarning ular faoliyatidan noroziligi natijasi edi. Yaxshiki, fuqarolarning norozilik namoyishlari tufayli ish “o‘lmay” qoldi», — dedi u.

“Penta” amaliy siyosiy tadqiqotlar markazi rahbari, siyosatshunos Vladimir Fesenko fikricha, hozirgi asosiy chaqiriq — to‘laqonli tergov va keyingi sud jarayoni zaruratini urush paytida nisbatan siyosiy barqarorlikni saqlash bilan muvozanatlashtirish, boshqaruv inqirozining oldini olishdir.

U, shuningdek, “Midas” ishi kelajakda — ayniqsa, urush tugaganidan keyingi saylovlar arafasida siyosiy mojarolar katalizatoriga aylanishi mumkinligini istisno etmadi. Uning fikricha, Mindichning prezident jamoasiga yaqinligi sababli bu tergov Volodimir Zelenskiy uchun jiddiy siyosiy risk hisoblanadi. «Tergov oylarcha, sud yillarcha davom etadi — bu ishni kelajakdagi saylovlarda Zelenskiy uchun “kechiktirilgan portlash”ga aylantiradi», — dedi Fesenko.

Tahlilchi va investitsiya bankiri Sergey Fursa esa NABU tergovi faqat prezident reytingiga emas, davlat boshqaruviga ham ta’sir ko‘rsatishi mumkinligini ta’kidlab, hokimiyatni qat’iy va ochiq harakat qilishga chaqirdi. «Urush paytida Ukraina hokimiyati legitimlik qoldiqlarini yo‘qotishiga yo‘l qo‘ya olmaymiz. Aks holda, Birinchi jahon urushi ssenariysi — dezertirlik, umidsizlik va siyosiy xaos takrorlanishi xavfi bor. Hokimiyat NABU fosh etishlariga to‘g‘ri javob berishi kerak. Asosiysi — vazirlarni bo‘shatish. Bu birinchi va shoshilinch qadam. Yillab kutiladigan hukmlar ortiga yashirinish mumkin emas. Iste’folar va jamiyat hamda sheriklar ishonchini qozonadigan yangi odamlar kerak. Va, albatta, NABU bilan urushni to‘xtatish ham zarur», — deb yozdi Fursa Facebook’da.