O‘zbekiston va Rossiya mehnat migratsiyasi bo‘yicha “pilot loyiha”ni qayta yo‘lga qo‘yadi

O‘zbekiston prezidentining 2024 yil 17 oktyabridagi 367-sonli “Chet elda mehnat faoliyati jarayonlarini tartibga solish bo‘yicha qo‘shimcha chora-tadbirlar to‘g‘risida”gi farmoni ijrosi doirasida O‘zbekiston tashqi ishlar vaziri o‘rinbosari Olimjon Abdullayev Rossiya Federatsiyasining O‘zbekistondagi favqulodda va muxtor elchisi Aleksey Yerxov bilan uchrashuv o‘tkazdi.

Muloqotda O‘zbekiston fuqarolarining Rossiyada mehnat migratsiyasini tartibga solish masalalari batafsil ko‘rib chiqildi. Xususan, tomonlar “pilot loyiha”ni qayta yo‘lga qo‘yish, migratsiya tartib-taomillarini, tibbiy ko‘rikni va rus tili imtihonini Toshkent va Jizzaxdagi Rossiya oliy o‘quv yurtlari filiallariga ko‘chirish yuzasidan fikr almashdi.

Shu bilan birga, rus tili, tarixi va qonunchiligi bo‘yicha o‘quv markazlarini tashkil etish, kasbiy ta’lim tizimida o‘qituvchilar va ishlab chiqarish xodimlarini tayyorlashga Rossiyadan mutaxassislarni jalb etish masalalari muhokama qilindi.

Uchrashuvda migratsiya reydlari jarayonida O‘zbekiston fuqarolarining huquqlari buzilishi yoki kamsitilishiga yo‘l qo‘ymaslik zarurligiga alohida urg‘u berildi.

Migratsiya oqimlarini tartibga solish bo‘yicha tuzilgan ishchi guruh doirasida yuzaga kelayotgan masalalarni tezkor hal etish maqsadida muntazam uchrashuvlar o‘tkazib borish to‘g‘risida kelishuvga erishildi.