Livitt: Ukraina bo‘yicha muzokaralar davom etmoqda, lekin prezidentlar bu hafta uchrashmaydi

AQSh va Ukraina prezidentlari Donald Tramp va Volodimir Zelenskiyning joriy haftadagi uchrashuvi rejalashtirilmagan. Bu haqda dushanba kuni, 24 noyabrda Oq uy matbuot kotibi Kerolayn Livitt ma’lum qildi.

«Shoshilinchlik hissi bor. Prezident (Tramp – tahr.) bu kelishuv imzolanishini va bu urush yakunlanishini istaydi», – deb keltiradi Livittning so‘zlarini Amerikaning ABC News telekanali. U yangilangan rejani yana bir bor Rossiya tomoniga taqdim etish kerakligini ta’kidladi.

Oq uy matbuot kotibi Kiyev va Vashington o‘rtasidagi «tinchlik rejasi» bo‘yicha muzokaralarning o‘zi esa samarali kechayotgani, ammo bir qator kelishilmagan masalalar saqlanayotgani haqida ma’lum qildi. Uning so‘zlariga ko‘ra, Donald Tramp Rossiya va Ukraina prezidentlariga «bosim o‘tkazmoqda». Amerika prezidenti avvalroq tinchlik kelishuvini imzolash uchun oxirgi sana sifatida 27 noyabrni tilga olgan edi.

Rossiyaning Ukrainaga qarshi urushi masalasi Tramp bilan Xitoy Xalq Respublikasi raisi Si Jinping o‘rtasidagi telefon suhbatida ko‘tarilgan-ko‘tarilmagani haqidagi savolga javob berar ekan, Livitt bu mavzuda gapirilganini, ammo suhbatning asosiy mavzusi AQSh–Xitoy munosabatlari bo‘lganini aytdi.

Bir necha soat avval DW'ning Vashingtondagi muxbiri xabariga ko‘ra, manbalardan biri ma’lum qilganidek, agar Jyenevadagi muzokaralarda o‘zgarishga erishilsa, Volodimir Zelenskiyning kelasi haftada Oq uyga tashrifi amalga oshishi mumkin.

Ukraina va Qo‘shma Shtatlar rasmiylari 24 noyabrga o‘tar kechasi ikki mamlakat delegatsiyalari ishtirokida Jyenevada o‘tkazilgan «samarali muzokaralar» natijasida Ukrainada tinchlikka erishish bo‘yicha yangilangan «hadli hujjat» tayyorlanganini bir vaqtning o‘zida ma’lum qildi. Mazkur qo‘shma bayonot, unda tomonlar maslahatlashuvlarni samarali, deb topgani ta’kidlangan, Oq uy va Ukraina prezidenti saytlarida e’lon qilindi.

23 noyabr kechqurun AQSh davlat kotibi Marko Rubio Donald Tramp ma’muriyatining qayta ishlangan tinchlik rejasi yuksak amalga oshish salohiyatiga ega ekanini bildirgan edi. U Jyenevada Ukraina delegatsiyasi va uning yevropalik ittifoqchilari vakillari bilan o‘tkazilgan maslahatlashuvlardan so‘ng jurnalistlarga muzokaralar natijasida endilikda keyingi ish uchun asos bo‘ladigan «asosiy hujjat» yaratilganini aytdi. Xuddi shu fikrni ukrain delegatsiyasiga rahbarlik qilayotgan Ukraina prezidenti idorasi rahbari Andrey Yermak ham qo‘llab-quvvatladi.

Dpa axborot agentligi avvalroq xabar qilishicha, Yevropaning Rossiyaning Ukrainaga qarshi urushiga barham berish bo‘yicha AQSh rejasiga taklif etgan o‘zgartishlari Kiyev foydasiga bir qator muhim bandlarni sezilarli darajada yumshatishni nazarda tutadi. Keyinchalik Britaniyaning Financial Times gazetasi va AQShning The Washington Post (WP) nashri manbalariga tayanib yozishicha, Tramp ma’muriyati taklif qilgan Ukrainadagi urushni to‘xtatish rejasi 28 banddan 19 bandgacha qisqartirilgan, o‘zgartishlar esa Jyenevadagi muzokaralardan so‘ng kiritilgan.

Nashrlar rejadan qaysi moddalar olib tashlanganini aniqlashtirgani yo‘q. WP suhbatdoshlari bandlarning aniq soni hali yakuniy tarzda kelishilmaganini alohida ta’kidladi. Ularning ma’lumotlariga ko‘ra, rejaning asosida hanuzgacha AQShning dastlabki taklifi turibdi, OAVda e’lon qilingan Yevropa loyihalaridan biri emas. Yevropa takliflari «foydali» deb baholangan, biroq AQSh hanuz asosiy e’tiborni o‘zining dastlabki hujjatiga qaratayotganini WP manbasi ta’kidladi.

20 noyabr kuni AQSh Ukraina uchun 28 banddan iborat «tinchlik rejasi»ni taqdim etgan edi. Hujjatga ko‘ra, xususan, Ukraina Donbassdan o‘z qo‘shinlarini to‘liq chiqarishi, armiya sonini keskin qisqartirishi, uzoq masofali qurollardan va NATOga kirish niyatidan voz kechishi lozim.