YeI yetakchilari: Ukraina xavfsizligi butun Yevropa uchun hal qiluvchi ahamiyatga ega

Yevropa Ittifoqi yetakchilari dushanba kuni, 24 noyabrda, Rossiyaning Ukrainaga qarshi urushiga barham berish bo‘yicha muzokaralarda qayd etilgan siljishni qo‘llab-quvvatladi, biroq shu bilan birga Jyenevada AQSh tinchlik rejasini qayta ishlash uchun ko‘rilgan sa’y-harakatlarga qaramay, yechimini topmagan masalalar hali ham borligini eslatib o‘tdi.

«Ish hali yakunlanmagan bo‘lsa-da, hozirda olg‘a siljish uchun mustahkam asos mavjud», — dedi Yevropa Komissiyasi raisi Ursula fon der Lyayyen Angola poytaxti Luandada bo‘lib o‘tgan YeI–Afrika Ittifoqi sammitida.

YeI yetakchilarining norasmiy uchrashuvi yakunlari bo‘yicha jurnalistlar oldida so‘zlar ekan, Yevrokomissiya rahbari ittifoqchilarni «birdam qolishga va Ukraina manfaatlarini sa’y-harakatlar markazida saqlashda davom etishga» chaqirdi.

«Gap butun qit’amizning xavfsizligi haqida ketmoqda — ham bugun, ham kelajakda. Bugungi Luandadagi uchrashuv yana bir bor Ukrainaga qo‘llab-quvvatlov bo‘yicha birdam ekanimizni tasdiqladi», — dedi fon der Lyayyen.

U YeI kelgusida ham saqlab qoladigan «asosiy prinsiplar»ni sanab o‘tdi: «Ukrainaning hududiy butunligi va suvereniteti hurmat qilinishi shart, qurolli kuchlariga taalluqli qarorlarni faqat suveren davlat sifatida Ukraina o‘zi qabul qilishi mumkin».

Yevrokomissiya rahbari sammitda yana bir bor bedarak yo‘qolgan va o‘g‘irlab ketilgan ukrain bolalari taqdiri masalasini ko‘targanini ham qo‘shimcha qildi: «Ular uyiga qaytishi kerak».

Yevropa Kengashi raisi Antoniu Koshta o‘z navbatida tinchlik muzokaralarida «yangi impuls» yuzaga kelganini qayd etdi. «Hali hal etiladigan ayrim masalalar bor, ammo yo‘nalish ijobiy», — dedi Koshta Jyenevadagi Ukraina va AQSh vakillari uchrashuvini sharhlar ekan.

U, shuningdek, Yevropa Ittifoqiga bevosita taalluqli masalalar — sanksiyalar, YeI kengayishi yoki muzlatilgan Rossiya aktivlari kabi yo‘nalishlar «YeIning to‘liq ishtirokini va uning tomonidan qarorlar qabul qilinishi»ni talab etishini ta’kidladi.

«Biz bu jarayonni qo‘llab-quvvatlashni davom ettirishga tayyormiz, Yevropa Ittifoqi bilan yaqin hamkorlikda, shuningdek Ukraina, AQSh va NATO bilan birga ishlashni istaymiz», — deya qo‘shimcha qildi Yevropa Kengashi rahbari.