«Bir muammoni hal qilish kerak» – Uitkoff va Ushakovning Putin va Ukraina haqidagi suhbati rasshifrovkasi e’lon qilindi

Undan ma’lum bo‘lishicha, Uitkoff Kremlga Putin Trampga nimalar deyishi kerakligi bo‘yicha maslahat bergan, Dmitriyev esa Moskvaning tinchlik rejasi bo‘yicha talablarini AQShga norasmiy ravishda yetkazgan.

{Yii::t(}

O'tkazib yuborish 6s

O'tkazib yuborish

AQSh prezidentining maxsus vakili Stiv Uitkoff oktyabr oyida RF prezidenti yordamchisi Yuriy Ushakovga Rossiya-Ukraina urushini to‘xtatish bo‘yicha tinchlik kelishuvi ustida birgalikda ishlashni taklif qilgan. Bloomberg agentligi 25 noyabr kuni Uitkoff va Ushakov o‘rtasida 14 oktyabr kuni o‘tkazilgan telefon muloqotiga asoslangan katta material tayyorladi – keyin esa to‘liq rasshifrovka ham e’lon qilindi. Nashr bu yozuvni qayerdan olganiga aniqlik kiritmagan.

Besh daqiqadan ko‘proq vaqt davom etgan muloqot chog‘ida Uitkoff Ushakovga Rossiya prezidenti Vladimir Putinni chuqur hurmat qilishini bildirgan. Shuningdek, Donald Trampga Rossiya doim tinchlik kelishuviga intilishi haqida aytganini ma’lum qilgan. Uitkoff tinchlikka erishish uchun Donetsk, balki, «yana qandaydir hududlar almashinuvi» kerakligini tushunishini qayd etadi.

Shuningdek, Ushakov muloqot chog‘ida Uitkoffdan Tramp va Putinning qo‘ng‘iroqlashuvi qanchalik «foydali» bo‘lishi haqida so‘raydi. Uitkoff ijobiy ma’noda javob qaytaradi va Ushakovga bir qancha tavsiyalar beradi – u Putin Trampni G‘azo bo‘yicha tinchlik kelishuviga erishilgani bilan tabriklashini, Rossiya uni bu masalada qo‘llab-quvvatlashini hamda AQSh prezidentini tinchlik odami sifatida hurmat qilishini aytishni maslahat qilgan.

Bundan tashqari, Trampning maxsus vakili Oq uyga Ukraina prezidenti Volodimir Zelenskiy kelayotganini aytib, Putin bu uchrashuvdan oldin Trampga qo‘ng‘iroq qilishini taklif qiladi. Quyida ushbu suhbatning to‘liq rasshifrovkasi keltiriladi.

Ushakov va Uitkoff muloqoti

Uitkoff: Salom, Yuriy.

Ushakov: Aga, Stiv, salom, ishlar qalay?

Uitkoff: Yaxshi, Yuriy. Senda-chi?

Ushakov: Hammasi joyida. [G‘azo bo‘yicha kelishuvga erishilgani bilan] tabriklayman, do‘stim.

Uitkoff: Rahmat.

Ushakov: Sen juda a’lo darajada ishlading. Shunchaki juda zo‘r. Senga katta rahmat. Rahmat, rahmat.

Uitkoff: Rahmat, senga ham Yuriy, qo‘llab-quvvatlov uchun ham rahmat. Mamlakatingiz [kelishuvni] qo‘llab-quvvatlaganidan xabardorman va buning uchun sendan minnatdorman.

Ushakov: Ha, ha, ha. Sen bilsang kerak, biz buning uchun birinchi Rossiya-arab sammitini to‘xtatib turdik. (Sammit 2025 yil 15 oktyabrga belgilangandi, ammo bir necha kun qolganida qoldirilgan)

Uitkoff: Ha.

Ushakov: Aga, chunki biz sizlar bu mintaqada chinakam ish olib boryapsiz deb hisobladik.

Uitkoff: Menga qara, senga bir gap aytaman. O‘ylaymanki, agar biz Rossiya-Ukraina masalasini hal qilolsak, barcha quvonchdan sakraydi.

Ushakov: Ha, ha, ha. Ha, faqat bir muammoni hal qilishingiz kerak (kuladi).

Uitkoff: Qanaqa?

Ushakov: Rossiya-Ukraina urushini.

Uitkoff: Buni bilaman! Qanday hal qilamiz?

Ushakov: Do‘stim, men shunchaki maslahatingni olmoqchiman. Nima deb o‘ylaysan, bosslarimiz telefon orqali gaplashishi foydali bo‘ladimi?

Uitkoff: Ha, o‘ylaymanki, ha

Ushakov: Aga. Seningcha qachon buning imkoni bo‘ladi?

Uitkoff: O‘ylaymanki, siz taklif qilishingiz yetarli, mening boshlig‘im tayyor bo‘ladi.

Ushakov: Okey, okey.

Uitkoff: Yuriy, Yuriy, mana men nima qilgan bo‘lardim. Maslahatim.

Ushakov: Ha, marhamat.

Uitkoff: Men qo‘ng‘iroq qilib, prezidentni bu yutuq bilan tabriklab, uni qo‘llab-quvvatlashimni, uni tinchlik odami sifatida hurmat qilishim va uning ishlari natijalaridan chin dildan xursandligimni aytgan bo‘lardim. Men shunday degan bo‘lardim. O‘ylaymanki, shundan keyin suhbat juda yaxshi kechadi.

Chunki – kel yaxshisi, men prezidentga nima deganimni aytib beray. Men unga siz, Rossiya Federatsiyasi, doimo tinchlik kelishuvini xohlashingizni aytdim. Men bunga ishonaman. Men prezidentga bunga ishonishimni aytdim. Va menimcha, muammo shundaki... muammo murosaga kelishi qiyin bo‘lgan ikki mamlakat borligida, ammo murosa qilolsak, bizda tinchlik kelishuvi bo‘ladi.

Buni G‘azoda bo‘lgani kabi 20 banddan iborat tinchlik taklifi sifatida taqdim etishimiz mumkin deb o‘ylayman. Biz Trampning 20 banddan iborat rejasini tuzdik, bu tinchlikka erishish uchun 20 band edi va menimcha, biz siz bilan ham xuddi shunday qila olamiz. Xullas...

Ushakov: Okey-okey, do‘stim. O‘ylaymanki, yetakchilarimiz aynan shuni muhokama qilishi mumkin. Stiv, men gapinga qo‘shilaman, u [Putin] tabriklaydi, mister Tramp – haqiqiy tinchlikparvar odam ekani va hokazo gaplarni aytadi. U buni aytadi.

Uitkoff: Yana bir gap, bu ham ajoyib bo‘lardi.

Ushakov: Xo‘sh-xo‘sh.

Uitkoff: Bordiyu… meni eshit…

Ushakov: Men buni boss bilan muhokama qilaman va keyin sen bilan bog‘lanaman. Kelishdikmi?

Uitkoff: Aga, shuning uchun nima deyayotganimni eshit. Men shunchaki buni aytishingni xohlayman, balki buni prezident Putinga aytarsan, chunki bilasan, men prezident Putinni chuqur hurmat qilaman.

Ushakov: Ha, ha.

Uitkoff: Balki u prezident Trampga shunday der: Stiv va Yuriy [G‘azo masalasidagi kabi] 20 bandlik rejaga o‘xshash rejani muhokama qilishgan, bu vaziyatni o‘lik nuqtadan siljita oladigan narsa bo‘lishi mumkin. Biz tinchlik kelishuvi uchun nima kerakligini tushunib olish uchun bunday narsalarga ochiqmiz.

Endi esa oramizdagi gap: men nima kerakligini tushunaman – Donetsk, balki yana qaysidir hududlarni almashish. Ammo men shuni aytmoqchimanki, to‘g‘ridan to‘g‘ri bunday gapirishdan ko‘ra, kel, optimistroq gaplashaylik, chunki shunday yo‘l bilan kelishuvga erishamiz, deb o‘ylayman. Va aytishim mumkinki, Yuriy, prezident menga bitim tuzishim uchun ko‘p erkinliklar va vakolatlar beradi.

Ushakov: Tushunaman…

Uitkoff: shunday ekan, biz shunday vaziyat yarata olsak – [Trampga] men Yuriy bilan gaplashdim va biz muhokama qildik, deya olsam, o‘ylaymanki, bu katta progressga olib kelishi mumkin.

Ushakov: Yaxshi, eshitilishi yomon emas. Yomon emas.

Uitkoff: Va yana bir gap – Zelenskiy juma kuni Oq uyga keladi.

Ushakov: Buni bilaman (kuladi).

Uitkoff: Men bu uchrashuvda qatnashaman, chunki mendan shuni xohlashadi, lekin agar iloji bo‘lsa, sening xo‘jayining bilan juma kungi uchrashuvgacha qo‘ng‘iroqlashuv o‘tkazish kerak, deb o‘ylayman.

Ushakov: Demak, ungacha, shundaymi?

Uitkoff: To‘g‘ri.

Ushakov: Okey-okey. Men maslahatingga quloq solaman. Shuning uchun men buni boss bilan gaplashib ko‘raman va sen bilan bog‘lanaman, bo‘ladimi?

Uitkoff: Okey, Yuriy, gaplashamiz.

Ushakov: Juda soz, juda soz. Katta rahmat. Rahmat.

Uitkoff: Xayr, xayr.

Ushakov: Xayr.

Bloomberg Uitkoff va Ushakov Tramp Falastin-Isroil mojarosi bo‘yicha tinchlik kelishuviga erishganidan va Hamas tomonidan garovga olinganlarni ozod qilganidan ko‘p vaqt o‘tmay suhbatlashganini qayd etgan.

Ushakov, aftidan, Uitkoffning ba’zi maslahatlarini qabul qilgan. Tramp 16 oktyabr kuni Putin bilan bo‘lib o‘tgan telefon muloqotidan so‘ng shunday degandi: «Prezident Putin meni va Qo‘shma Shtatlarni Yaqin Sharqdagi tinchlik bo‘yicha ulkan yutuq bilan tabrikladi». Ushakovning o‘zi ham jurnalistlarga Putin «suhbatni Donald Trampni G‘azo sektoridagi vaziyatni normallashtirish borasidagi muvaffaqiyati bilan tabriklashdan boshlagani»ni aytgandi.

Shu muloqotdan keyin Uitkoff AQShda RF prezidentining xorijiy mamlakatlar bilan hamkorlik masalalari bo‘yicha maxsus vakili Kirill Dmitriyev bilan uchrashgan (Dmitriyevning o‘zi 24 oktyabr kuni Mayamiga borib, u yerda uch kun qolganini tasdiqlagan). Bloomberg tahlil qilgan boshqa bir audioyozuvga ko‘ra, Dmitriyev va Ushakov 29 oktyabr kuni telefon orqali gaplashgan hamda Moskva tinchlik taklifida o‘z talablarini qanchalik qat’iyat bilan qo‘yishi kerakligi muhokama qilingan.

Bu muloqotda Ushakov Rossiya «maksimal darajada» talab qo‘yishi kerakligini aytadi va AQSh istalgan taklifni noto‘g‘ri talqin qilishi va nimanidir olib tashlab, keyin esa kelishuvga erishganini e’lon qilishidan xavotir bildiradi.

Dmitriyev bunga javoban (Rossiya ishlab chiqqan) hujjatni AQSh bilan norasmiy ravishda bo‘lishishni taklif qiladi va Tramp ma’muriyati Rossiya versiyasini to‘liq qabul qilmasa ham, hech bo‘lmaganda unga juda yaqin nimadir qilishiga ishonch bildiradi. Dmitriyev, shuningdek, Ushakovga hujjatni keyinroq «Stiv» bilan muhokama qilish mumkinligini aytadi. Bu suhbat quyidagicha kechgan.

Ushakov va Dmitriyev muloqoti

Ushakov: Ale.

Dmitriyev: Yuriy Viktorovich.

Ushakov: Ha, Kirill Aleksandrovich, xo‘sh, men u yerga barchasini yubordim. Ertaga o‘sha yerda gaplashamiz.

Dmitriyev: Juda soz, juda soz, ha, ha, ha. Men Saudiya Arabistoniga uchib ketdim, lekin menga juda muhim tuyulyapti, ha, chunki bu oldinga siljishning juda yaxshi yo‘li.

Ushakov: Xo‘sh, bizga maksimum, sen nima deb o‘ylaysan, shunday emasmi?

Dmitriyev: Yo‘q, qarang. Menimcha, mana bu qog‘ozni o‘z pozitsiyamiz qilib ko‘rsatamiz va men bularni norasmiy ravishda to‘g‘ridan-to‘g‘ri yetkazaman. Ular esa o‘zlariniki qilishsin. Ular bizning versiyani to‘liq qabul qiladi, deb o‘ylamayman, lekin hech bo‘lmaganda unga maksimal darajada yaqin bo‘ladi.

Ushakov: Hamma gap shundaki, ular [buni] olmasliklari mumkin, lekin [o‘z rejasini] biz bilan kelishilgan, deyishadi. Men shundan qo‘rqaman

Dmitriyev: Yo‘q, yo‘q, yo‘q. Bu aniq, lekin men fikringizga qo‘shilaman, buni so‘zma-so‘z yetkazaman.

Ushakov: Ular keyin hammasini o‘zgartirib yuborishlari mumkin. Shunday xavf bor. Bor. Mayli, hechqisi yo‘q. Ko‘ramiz.

Dmitriyev: Ha, menga shunday tuyulyapti... Keyin siz ham Stiv bilan shu qog‘oz bo‘yicha gaplashishingiz mumkin. Ya’ni biz ehtiyotkorlik bilan bajaramiz.

Ushakov: (tushunarsiz jumla)

Dmitriyev: Sizga katta rahmat, Yuriy Viktorovich. Katta rahmat. Rahmat. Ko‘rishguncha.

***

Kirill Dmitriyev Yuriy Ushakov bilan suhbati yozuvini feyk deb atadi. Ushakov esa Stiv Uitkoff va Kirill Dmitriyev bilan suhbatlari yozuvlari qanday qilib Bloomberg’​​da paydo bo‘lganidan bexabarligini aytdi. «Kimdir sizdiradi, kimdir eshitadi, lekin biz emas», – dedi Ushakov.