Qirg‘izistonda sobiq sudyalar va prokuror seriyali qotilning jazosini yengillashtirgani uchun hibsga olindi

Tergov ma’lumotlariga ko‘ra, sudyalar va prokuror 21 yoshli qizni o‘ldirishga urinishda aybi to‘liq isbotlangan Qumarbek Abdirovning jazosini yengillashtirgan. U amnistiya tufayli ozodlikka chiqib, yana qotillikka qo‘l urgan.

Foto: Qirg‘iziston IIV

Qirg‘izistonda Bishkek shahar sudining uch nafar sobiq sudyasi va prokurori hibsga olindi, ular 2016 yilda bir qator qotilliklarni tan olgan shaxsga nisbatan jazoni yumshatgan edi. Bu haqda respublika IIV matbuot xizmati xabar berdi.

Tergov ma’lumotlariga ko‘ra, sudyalar Saniya Branchayeva, Janil Mambetali va Qaysin Abakirov (IIV press-relizida faqat bosh harflar ko‘rsatilgan, to‘liq ism va familiyalar OAV tomonidan keltirilgan) prokuror Dastan M. bilan birgalikda 21 yoshli qizni o‘ldirishga urinishda aybi to‘liq isbotlangan Qumarbek Abdirovning jazosini yengillashtirishda ishtirok etgan.

2015 yilda sud uni 12 yilga ozodlikdan mahrum qilgan, ammo 2016 yilda yuqorida nomi tilga olinganlar advokat S.J. vositachiligida Qirg‘iziston Jinoyat-protsessual kodeksi normalarini buzgan holda jazoni yengillashtirgan. Natijada 2018 yildayoq Abdirov amnistiya bo‘yicha ozodlikka chiqqan.

2025 yil sentabr oyida u 17 yoshli Oysuluv Mukashevani zo‘rlab o‘ldirganlikda ayblanib, qo‘lga olingan edi. Ish shu qadar shov-shuvga sabab bo‘ldiki, Qirg‘iziston prezidenti Sadir Japarov o‘lim jazosini qaytarishni buyurdi.

Branchayeva, Mambetali va Abakirov Qirg‘iziston Jinoyat kodeksining 336-moddasi («Korrupsiya») va 352-moddasida («Adolatsiz hukm yoki boshqa sud hujjatini chiqarish») nazarda tutilgan jinoyatlarni sodir etganlikda ayblanmoqda. Prokuror ham 336-modda bilan ayblanyapti.

So‘roqlarda Abdirov va uning yaqin qarindoshlari unga muddatidan oldin ozodlikka chiqishiga imkon bergan korrupsiya sxemasi haqida batafsil ma’lumot berdi. Natijada sudyalarga pora berganlikda gumon qilinib, advokat hibsga olindi. O‘z navbatida, Sudyalar kengashi sobiq hamkasblarini jinoiy javobgarlikka tortishga rozilik berdi. E’tiborlisi, uchalasi ham korrupsiyaga qarshi tekshiruvlar doirasida avvalroq ishdan bo‘shatilgan edi.

Oysuluv Mukashevaning o‘ldirilishi bilan bog‘liq so‘roqlar davomida Abdirov bir necha ayolni zo‘rlagani va o‘ldirganini tan oldi.

Tayyorlagan: Сардор Юсупов

#Qirg‘iziston #korrupsiya #seriyali qotil