Ukrainaning iste’foga chiqqan bosh muzokarachisi, qurolsiz asirni otgan Isroil politsiyasi va Rossiyaning portlagan tankerlari – kun dayjesti

Shuningdek, u prezident Volodimir Zelenskiyning yaqin ittifoqchisi edi. U Zelenskiy prezident bo‘lishidan oldin ham uning yaqin do‘sti bo‘lib kelgan va 2019 yildagi saylov kampaniyasini boshqarishda muhim rol o‘ynagan.

Yermak kvartirasi tintuv qilinganini tasdiqladi va tergovchilarga hamkorlik qilayotganini bildirdi. Milliy korrupsiyaga qarshi byuro tintuv qaysi tergov bilan bog‘liq ekanini ochiqlamadi.

Noyabrda antikorrupsion organlar davlat atom energetikasi kompaniyasining sobiq mansabdorlari va Zelenskiyning sobiq biznes hamkorlaridan birini o‘z ichiga olgan tergov boshlagan edi. Gap – 100 million dollarlik pora sxemasi bo‘yicha tekshiruv haqida ketmoqda.

Ukraina Rossiya bilan kurashayotgan bir paytda, yuqori martabali mansabdorlar o‘rtasidagi yirik korrupsion tergov jamoatchilikning g‘azabini qo‘zg‘atdi va mamlakat rahbariyatini inqirozga duch qildi. Bu orada Vashington Kiyevni kelishuvga ko‘ndirish uchun bosimini kuchaytirmoqda.

«Rossiya Ukraina xato qilishini istaydi. Biz bunday qilmaymiz», dedi Zelenskiy juma kungi videomurojaatida birdamlikka chaqirarkan. «Bizning ishimiz davom etadi. Kurashimiz davom etadi», dedi u.

Hongkongdagi yong‘in ishi bo‘yicha 8 kishi hibsga olindi

Honkong tarixidagi eng dahshatli yong‘inlardan birida halok bo‘lganlar soni 128 kishiga yetdi. Yong‘in – 40 soatdan ko‘proq muddatda to‘liq jilovlandi. Orolda rasman uch kunlik motam boshlandi.

Taxminan 200 kishi hanuz bedarak yo‘qolganlar ro‘yxatida, 89 jasadning esa hali shaxsi aniqlanmagan. Odamlar kasalxonalar va morglarni kezib, yaqinlarini topishga urinmoqda.

Juma kuni shahar korrupsiyaga qarshi idorasi yong‘inga aloqador deb gumon qilingan sakkiz kishini qo‘lga oldi.

Rasmiylarning aytishicha, yong‘in sababi hali aniqlanmagan. Biroq dastlabki tekshiruvlarga ko‘ra, olov bir minoraning pastki qavatlaridagi himoya to‘ridan boshlangan va «o‘ta yonuvchan» ko‘pik panellar hamda bambuklar uning tez tarqalishiga yordam bergan.

Yong‘in xavfsizligi xizmati rahbari Endi Yong sakkizta uyning barchasida yong‘in signalizatsiyasi «nosoz bo‘lgani»ni aytib, pudratchilarga qarshi chora ko‘rilishini va’da qildi.

Qora dengizda Rossiya tankerlari portladi

28 noyabr kuni Rossiyaning «soya floti»ga mansub ikki tanker Qora dengizda portlab ketdi. Turkiya rasmiylari Bosfor yaqinida kemalarda bortdagilarni qutqarish boshlanganini bildirdi.

Xususan, 274 metr uzunlikdagi Kairos tankeri Misrdan Rossiyaga yo‘l olayotgan paytda Qora dengizda portlash sodir bo‘lgan va yong‘in chiqqan.

Turkiya Transport vazirligiga ko‘ra, hodisa joyiga zudlik bilan qutqaruv qayiqlari yuborilgan va bortdagi 25 nafar ekipaj a’zosi xavfsiz qutqarilgan. Dengiz ishlari boshqarmasi ma’lumotiga ko‘ra, Kairos kemasiga qirg‘oqdan 28 km uzoqlikda «tashqi ta’sir» bo‘lgan.

Yana bir tanker — Virat esa Qora dengizning sharqiy qismida, qirg‘oqdan taxminan 35 dengiz mili masofada “zarba olgani” aytilmoqda. Kemaning dvigatel bo‘limida qalin tutun aniqlangan, ammo bortdagi 20 nafar xodimning ahvoli yaxshi.

Ikkala tanker ham yuksiz holda bo‘lgan. Turkiya rasmiylari hodisalar tafsilotlarini ochiqlamadi.

Turk OAVlari kemalar minaga urilgan bo‘lishi mumkinligini taxmin qilmoqda. Rasmiylar nazarda tutgan «tashqi ta’sir» ham aynan minalar bo‘lishi mumkin.

Kairos ham, Virat ham Ukrainadagi urush boshlanganidan so‘ng joriy etilgan sanksiyalar ro‘yhatiga tushgan.

Shri-Lankada siklon qurbonlari

Juma kuni Shri-Lankaga yopirilgan «Ditvah» sikloni keng ko‘lamli suv toshqinlarini keltirib chiqardi. Oqibatda 46 kishi vafot etdi, 23 kishi bedarak yo‘qolgani aytilmoqda. Kuchli yomg‘ir va shiddatli shamollar kelgusi 12 soat ichida yana toshqinlarni keltirib chiqarishi kutilmoqda.

Rasmiylarning aytishicha, halok bo‘lganlarning aksariyati sharqiy va markaziy hududlarga yog‘gan yomg‘ir sabab yuzaga kelgan ko‘chkilar oqibatida vafot etgan.

Mamlakat bo‘ylab qariyb 44 ming kishi zarar ko‘rgan. Maktablar va poyezd qatnovlari bekor qilindi, harbiylar va politsiya evakuatsiyani muvofiqlashtirdi.

Havo kuchlari OAVga taqdim etgan kadrlarga ko‘ra, tomlarda qolib ketgan ko‘plab oilalar vertolyot orqali xavfsiz joyga ko‘chirilgan.

20 mingdan ortiq politsiya va harbiy xizmatchi evakuatsiya choralarini kuchaytirdi. Tsiklon Shri-Lanka ustidan o‘tib, janubiy Hindistonga qarab siljishda davom etmoqda.