Tashiyev Xitoy kompaniyasi ishchilaridan qirg‘iz tilini o‘rganishni talab qildi

Qirg‘iziston Milliy xavfsizlik davlat qo‘mitasi rahbari Qamchibek Tashiyev Xitoyning China Road kompaniyasi vakillariga qirg‘iz tilini o‘rganish bo‘yicha topshiriq berdi.

U Issiqko‘l viloyatida avtomobil yo‘llari qurilishi bo‘yicha o‘tkazilgan yig‘ilish vaqtida Barskoon – Qorako‘l yo‘li uchastkasiga kim mas’ul ekanini so‘ragan. China Road vakili rus tilida javob qaytarib, bu yo‘lda aynan uning kompaniyasi ish olib borayotganini tasdiqlagan.

Shundan keyin Tashiyev Qirg‘izistonda qariyb 20 yildan beri faoliyat yuritayotgan kompaniya vakillarini haligacha davlat tilini bilmasligi uchun koyigan va ulardan mahalliy tilni o‘rganishni boshlashni talab qilgan.

«Nima uchun hali ham qirg‘iz tilini o‘rganmagansizlar? China Road Qirg‘izistonda necha yildan beri ishlaydi? 20 yil beri! Nima, qirg‘izcha gapirishni bilmaysizmi? O‘rganing!» – deydi u.

Xitoyliklar vakili esa uning so‘zlarini bosh irg‘ab ma’qullagan.

Bundan tashqari, Milliy xavfsizlik davlat qo‘mitasi rahbari 75 kilometrlik yo‘l qurilishi muddatlarini muhokama qildi. Kompaniya vakili shartnoma bo‘yicha ishni 2028 yil 1 sentabrgacha yakunlash rejalashtirilganini ma’lum qildi, biroq ishlarni muddatidan oldin – 2027 yil oxirigacha yakunlashga va’da berdi.