Benzinga naqd pul to‘lovining to‘xtatilishi va Aviator yong‘ini bo‘yicha jinoiy ish – mahalliy dayjest

Kun davomida Kun.uz yoritgan muhim mahalliy yangiliklar bilan tanishtiramiz.

Benzinga naqd pulda to‘lov to‘xtatiladi

1 apreldan boshlab bir qator to‘lovlar faqat naqdsiz shaklda qabul qilinadi, bu prezident farmonida ko‘zda tutilgan.

Hujjatga ko‘ra, avtomobillarga yonilg‘i quyish shoxobchalarida neft-gaz mahsulotlarini sotish va elektromobillar uchun zaryadlash bo‘yicha xizmatlar faqatgina bank kartalari yoki elektron to‘lov tizimlari orqali amalga oshiriladi.

Farmon respublikada naqdsiz hisob-kitoblarni ommalashtirish va yashirin iqtisodiyot ulushini qisqartirishga qaratilgan.

Shuningdek, naqd pulga uy-joy, avtomobil oldi-sotdisi ham bekor qilinmoqda.

Toshkentdagi Aviator savdo markazida yuz bergan yirik yong‘in bo‘yicha jinoiy ish ochildi

Ish Jinoyat kodeksining 19211-moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 259-moddasi (yong‘in xavfsizligi qoidalarini buzish) bilan ochildi.

Yashnobod tumani Parkent yo‘li ko‘chasida joylashgan ushbu savdo majmuasida yong‘in 31 yanvar kuni soat 15:30 dan keyin ikkinchi qavatda sodir bo‘lgan. U yerda Pixel bolalar maydonchasi, shuningdek, bir nechta ovqatlanish muassasasi joylashgan. Birinchi qavatdagi Korzinka supermarketi zarar ko‘rmagan.

Hodisadan so‘ng vayronalar ostidan 2 yosh-u 7 oylik qizning jasadi topilgan.

Oliy harbiy ta’lim muassasalariga hujjat qabul qilish boshlandi

1 fevraldan boshlab O‘zbekiston Mudofaa vazirligi tizimidagi oliy harbiy ta’lim muassasalariga o‘qishga kirish istagini bildirgan nomzodlardan arizalar qabul qilish boshlandi.

Ma’lum qilinishicha, nomzodlarning arizalari amaldagi tartibga muvofiq tuman (shahar) mudofaa ishlari bo‘limlari orqali qabul qilinadi.

Shu bilan birga nomzodlarga qulaylik yaratish maqsadida Mudofaa vazirligi tomonidan maxsus elektron platforma orqali arizalarni onlayn qabul qilish ham rejalashtirilgan. Platforma ishga tushirilgach, qo‘shimcha ma’lumot berilishi bildirildi.

Shaxmatchi Nodirbek Abdusattorov Tata Steel Chess turniri chempioni bo‘ldi

Nodirbek Abdusattorov shaxmat olamidagi eng nufuzli turnirlardan biri, Niderlandiyaning Veyk-an-Zeye shahrida o‘tkazilgan Tata Steel Chess 2026 turnirida g‘oliblikni qo‘lga kiritdi. O‘zbekistonlik shaxmatchi 13 imkoniyatdan 9 ochko to‘pladi (6 g‘alaba, 6 durang va 1 mag‘lubiyat). Bu uning uchun ushbu turnirdagi ilk chempionlik hisoblanadi.

Abdusattorov oldingi yillarda ham chempionlikka yaqin kelgandi – 2023 yilda 2-o‘rin, 2024 yilda 3-o‘rin, 2025 yilda 3-o‘rin. U to‘rtinchi urinishda o‘z maqsadiga erishdi.

Shuningdek, u ushbu turnirdagi muvaffaqiyatli ishtirokidan so‘ng onlayn reytingda dunyoning eng kuchli shaxmatchilari beshligiga qaytdi.