Iqtisodchilar dunyo bo‘yicha o‘ta qashshoqlikni bartaraf etish uchun qancha pul ketishini hisoblab chiqishdi

Amerikalik iqtisodchilar butun dunyoda o‘ta qashshoqlikni yo‘q qilish uchun qancha mablag‘ ketishini hisoblab chiqishdi. Ularning hisob-kitoblariga ko‘ra, buning uchun yiliga taxminan 318 milliard dollar —jahon yalpi ichki mahsulotining atigi 0,3 foizi talab qilinadi.

Kaliforniyadagi Berkli universiteti tadqiqotchilarining xulosalari daromadi past bo‘lgan 23 ta mamlakatdagi qashshoqlik ma’lumotlari tahliliga asoslangan.

Sun’iy intellekt texnologiyalari yuz millionlab odamlarning ehtiyojlarini o‘ta aniqlikda baholash va ularning kunlik daromadini 2,15 dollar — o‘ta qashshoqlikning xalqaro me’yoridan yuqoriga olib chiqish uchun zarur bo‘lgan maqsadli moliyaviy yordam hajmini hisoblash imkonini berdi.

Shu bilan birga, tadqiqot mualliflari qashshoqlikni bartaraf etish yo‘lida siyosiy qiyinchiliklar mavjudligini e’tirof etishgan. Ularning fikricha, ko‘plab kambag‘al davlatlar tashqi yordamsiz qashshoqlikni yo‘q qila olmaydi.

Ma’lumotlarga ko‘ra, dunyo bo‘yicha alkogol (jahon YaIMning 2,2 foizi) yoki kosmetika (0,6 foiz) uchun qilinadigan yillik xarajatlar qashshoqlikni yo‘q qilish uchun zarur bo‘lgan mablag‘dan bir necha barobar ko‘p.