“Gazprom neft” boshqaruvi raisining o‘rinbosari Sankt-Peterburgda qo‘lga olindi

“Gazprom neft” boshqaruvi raisining o‘rinbosari Anton Djalyabov Sankt-Peterburgda pudratchi tashkilotlar rahbarlaridan 29 mln rubldan ortiq summada pora olganlikda gumon qilinib qo‘lga olindi. Huquqni muhofaza qiluvchi organlar ma’lum qilishicha, 27 fevral, juma kuni unga nisbatan “o‘ta yirik miqdorda pora olish” moddasi bo‘yicha jinoyat ishi qo‘zg‘atilgan. Bu modda bo‘yicha 15 yilgacha ozodlikdan mahrum etish jazosi nazarda tutilgan.

TASS agentligi suhbatdoshining aniqlashicha, qo‘lga olishni Iqtisodiy xavfsizlik va korrupsiyaga qarshi kurash bo‘yicha bosh boshqarma xodimlari amalga oshirgan. Uning ma’lumotlariga ko‘ra, gap 2020–2021 yillarda sodir bo‘lgan ikki epizod haqida ketmoqda. Tergov versiyasiga ko‘ra, Djalyabov 28 mln rublga Sochi shahrida kvartira sotib olgan, shuningdek, uning ixtiyoriga qiymati 1,7 mln rubldan ortiq bo‘lgan kater o‘tgan.

Manba ta’kidlashicha, “tergov hisoblashicha, pul mukofoti evaziga u yirik qurilish pudratlari bo‘yicha amalda bajarilmagan ishlar qabul qilingani haqidagi hujjatlarni imzolagan, ular uchun to‘lov amalga oshirilishini ta’minlagan va ishlar muddatini buzgani uchun pudratchilarni jarimalar hamda penyalardan himoya qilgan”.

“Interfaks” agentligi aniqlashicha, Djalyabovga qo‘yilayotgan ayblovlar Rossiyaning Yamal-Nenets avtonom okrugidagi Nadim shahrida joylashgan “Gazprom invest” kompaniyasidagi ish faoliyati bilan bog‘liq. Jinoyat ishi Rossiya Tergov qo‘mitasi yurituvida turibdi.

Kutilishicha, tez orada unga nisbatan ehtiyot chorasi (qamoq, uy qamog‘i va h.k.) masalasi hal qilinadi.

Djalyabov 2020–2021 yillarda Nadimda “Gazprom invest” filialiga rahbarlik qilgan. 2021 yil mart oyidan 2023 yil avgust oyigacha u “Gazprom dobycha Noyabrsk”ning bosh direktori bo‘lgan. 2023–2024 yillarda “Gazprom neft”da bosh muhandis lavozimida ishlagan, 2024 yil aprel oyidan esa “Gazprom neft” boshqaruvi raisining o‘rinbosari bo‘lgan.