Jizzaxda alimentdan qarzdorlar elga ovoza qilinyapti. Huquqiy davlatda bu to‘g‘rimi?

Jizzax viloyatida aliment bo‘yicha qarzdorlarni jazolashning yangi usuli paydo bo‘ldi. Kun.uz'ga ma’lum bo‘lishicha, MIB xodimlari qarzdorlar ro‘yxatini mahalla Telegram-guruhlariga tarqatmoqda. Mahalla binosi va mahalla hududidagi masjidlarga qarzdorning suratini ilib qo‘yish amaliyoti ham yo‘lga qo‘yilgan.

Kun.uz manbasi yuborgan surat

Kun.uz suhbatlashgan huquqshunos masalaning inson sha’ni bilan bog‘liq jihati borligiga urg‘u berdi.

“Albatta, aliment to‘lash – bu ota-ona zimmasidagi qonuniy majburiyat. Davlat organlarining qarzdorlikni undirish bo‘yicha choralar ko‘rishi tabiiy va zarur. Biroq har qanday ijro harakati qonun doirasida va inson sha’ni hamda qadr-qimmatini hurmat qilgan holda amalga oshirilishi lozim”, – dedi u.

Yuristning qayd etishicha, qarzdorlik – huquqiy masala. Uni hal etish mexanizmlari sud va ijro organlari orqali belgilangan. Jamoatchilik oldida oshkora e’lon qilish esa shaxsiy ma’lumotlar daxlsizligi tamoyiliga zid bo‘lishi, sha’n va qadr-qimmatga putur yetkazishi, huquqiy davlat prinsiplariga mos kelmasligi mumkin.

“Huquqiy jamiyatda tartib-intizom jamoatchilik bosimi emas, avvalo qonun bilan ta’minlanishi kerak”, deydi huquqshunos.

Eslatib o‘tamiz, 2024 yil fevral oyida Navoiy viloyatining Karmana tumanida mahallalarga “Sharmanda doskasi” tarqatilgan, bu doskaga mahalla hududida yashovchi, firibgarlik jinoyatini sodir etgan va tegishli sud qarori qonuniy kuchga kirgan shaxslarning suratlarini ilib qo‘yish mo‘ljallangan edi.

O‘shanda ombudsman Feruza Eshmatova bu inson huquqlariga zid ekanini aytib chiqqandi.