Yaqin Şarqda uruşning ikkinçi kuni. Sönggi ma’lumotlar

The New York Times ma’lumotiga köra, Markaziy razvedka boşqarmasi Xominaiy qayerdaligini AQŞ va Isroil hujumidan biroz oldin aniqlagan. Oyatulloh bir neça oy davomida – 2025 yilning yozidan boşlab kuzatib borilgan. Şu orqali AQŞ razvedkasi Tehron markazidagi hukumat kompleksida 28 fevral kuni ertalab Eron oliy rahbariyati yiğilişi ötkazilişidan xabar topgan. Ertalabki soat 6 atrofida Isroil bazalaridan qiruvçi samolyotlar havoga kötarilgan. The Wall Street Journal naşri yozişiça, Isroil qiruvçi samolyotlari Xominaiy qarorgohiga 30 ta bomba taşlagan.

Operatsiya jarayonidan xabardor manbalarning aytişiça, hukumat binolari kompleksiga uyuştirilgan hujumdan keyin Eron maxsus xizmatlari rahbarlari joylaşgan nuqtalarga ham zarbalar berilgan. Mahalliy rasmiy naşrlar Eron armiyasi boş ştabi boşliği, general-leytenant Abdulrahim Musaviy, mamlakat mudofaa vaziri Aziz Nosirzoda, oyatullohning xavfsizlik böyiça maslahatçisi Ali Şamhoniy va Islom inqilobi qöriqçilari korpusi qömondoni Muhammad Pakpurning ölimini tasdiqladi.

Xominaiyning ölimidan keyingi rahbar saylanguniça mamlakatni vaqtinça Muvaqqat kengaş boşqaradi – bu kengaşdan mamlakatning amaldagi prezidenti Mas’ud Pizişkiyon, sud hokimiyati rahbari – boş qozi Ğulom-Husayn Muhsini-Ijaiy va Fiqh kengaşi vakili oyatulloh Alirizo A’rofiydan iborat böladi.

Isroilning yangi zarbalari

Isroil mudofaa armiyasi yakşanba kuni Isroil harbiy-havo kuçlari Tehrondagi obektlarga ketma-ket zarbalar berişni boşlaganini ma’lum qildi.

«Isroil harbiy-havo kuçlari Tehrondagi Eron rejimiga tegişli nişonlarga zarbalar seriyasini boşladi», - deyiladi armiya matbuot xizmati bayonotida.

Isroil harbiylariga köra, Eronning ğarbiy va markaziy qismidagi havo hujumidan mudofaa tizimlarining aksariyati, şuningdek, Eron raketa zaxiralarining yarmi yöq qilingan.

Eronning javob zarbalari

Eron zarbalarga javoban Isroilga hujum qildi. Tel-Avivda Eron ballistik raketasi turar joy binosiga kelib tuşgan, 40 yoşlar atrofidagi ayol halok böldi. Yana 27 kişi yaralangan – ikki kişining ahvoli örtaça oğirlikda, 25 kişi yengil tan jarohati olgan.

Islom inqilobi qöriqçilari korpusi ma’lumotlariga köra, zarbalarning oltinçi tölqini davomida Amerika bazalaridagi 27 ta obekt, şuningdek, Tel-Nof aviabazasi, Isroil mudofaa armiyasi boş ştabi va Tel-Avivdagi yirik mudofaa sanoati obekti nişonga olingan.

Islom respublikasining AQŞ va Isroil zarbalariga javoban yöllanayotgan Eron hujumlari Fors körfazining boşqa mamlakatlariga ham ta’sir körsatmoqda. Dubay xalqaro aeroportida uçib ketiş zallaridan biri dron zarbasi oqibatida şikastlangan, deb xabar berdi amirlik matbuot xizmati. Aeroportning tört nafar xodimi jarohatlangan. Dron parçalari qulaşi Burj-al-Arab mehmonxonasida yonğin çiqişiga olib keldi - osmonöpar binoning taşqi fasadi yonib ketgan, jabrlanganlar yöq. Dubayning özida havo hujumidan mudofaa kuçlari tomonidan töxtatilgan dronlar parçalari qulaşi oqibatida ikki kişi jabrlandi, deb xabar berdi amirlik rasmiylari.

Yakşanba kuni Ömondagi Dukm porti va sohil yaqinidagi neft tankeri ham Eron dronlari hujumiga uçradi. Bu AQŞ va Eron örtasidagi muzokaralarda vositaçilik qilgan uşbu sultonlikka qilingan ilk hujum böldi.

Neft tankeri ekipaji evakuatsiya qilingan, ekipaj a’zolaridan tört nafari jarohatlangan.

Yakşanba kuni tongida Bahrayn poytaxti Manamada va Qatarda ham portlaş ovozlari eşitilgan.

Abu-Dabida möljaldan oğdirilgan dronlardan biri Etihad Towers binosiga urilişi oqibatida bir ayol va yoş bola jarohat olgan. Dronlar Manama şahri aeroportiga ham hujum qilgan va zarar yetkazgan.

Birlaşgan Arab Amirliklari prezidenti maslahatçisi Anvar Gargaş Fors körfazi davlatlariga qilinayotgan hujumlar uçun Tehronni qattiq tanqid qildi. «Bu Eronni oğir pallada yakkalab qöyadi. Sizning uruşingiz qöşnilar bilan emas», – degan u.

BAA mudofaa vazirligiga köra, şanba kuni Eron BAA hududidagi nişonlarga 137 ta raketa va 209 ta dron uçirgan. 

Abu-Dabi aeroportida sodir bölgan portlaş oqibatida kamida bir kişi halok bölib, yetti kişi yaralangan. Tunda Dubay va Kuvaytdagi aeroportlar ham hujumga uçragan.

Qatar rasmiylari Eron mamlakat böylab 65 ta raketa va 12 ta dron uçirgani, ularning aksariyati tutib olingani, şu bilan birga, sakkiz kişi jarohatlangani, ulardan biri oğir ahvolda ekani haqida xabar bergan.

Harbiy harakatlar tufayli Isroil, Qatar, Suriya, Eron, Iroq, Kuvayt, Bahrayn va Birlaşgan Arab Amirliklari öz havo kengliklarini yopişgan.

Yaqin Şarqdagi asosiy aeroportlar – Dubay, Abu-Dabi va Doha aeroportlari faoliyatini töxtatgan, natijada Yaqin Şarqda işlovçi aviakompaniyalar 1800 dan ortiq reyslarni bekor qilişga majbur bölgan. Aeroportlarda ön minglab kişilar qolib ketgan.