Umra dasturlarining vaqtincha to‘xtatilishi va Toshkentda tirbandlikni kamaytirish uchun “Dolzarb 90 kun” – mahalliy dayjest

Yaqin Sharq mintaqasida vaziyat keskinlashgani tufayli O‘zbekiston Tashqi ishlar vazirligi o‘zbekistonliklarni ehtiyot choralarini ko‘rishga chaqirdi. Umra dasturi bo‘yicha Saudiya Arabistoniga ziyoratchilarni olib borish vaqtincha to‘xtatildi. Toshkent shahar hokimligi yo‘l harakati holatini yaxshilashga qaratilgan “Dolzarb 90 kunlik” tashabbusini e’lon qildi. Qoraqalpog‘iston Respublikasi va Xorazm viloyati aholisi uchun tabiiy gaz iste’moli bo‘yicha imtiyoz uzaytirildi.

Qoraqalpog‘istonni rivojlantirish dasturlari tasdiqlandi

Prezidentning “Qoraqalpog‘iston Respublikasini 2026 yilda ijtimoiy-iqtisodiy rivojlantirish va kelgusi yillar uchun mo‘ljallangan dasturlarni tasdiqlash to‘g‘risida”gi qarori qabul qilinib, hudud iqtisodiyoti o‘sishi, ishsizlik va kambag‘allikni qisqartirish hamda 2030 yilgacha eksport va investitsiya loyihalarini kengaytirish bo‘yicha asosiy maqsadlar belgilandi.

Qarorga muvofiq, Qoraqalpog‘istonni barqaror ijtimoiy-iqtisodiy rivojlantirishning ustuvor yo‘nalishlari sifatida qator ko‘rsatkichlarga erishish vazifasi qo‘yildi.

TIV Yaqin Sharq bo‘yicha safarlarni vaqtincha kechiktirishni tavsiya qildi

Yaqin Sharq mintaqasida vaziyat keskinlashgani tufayli O‘zbekiston Tashqi ishlar vazirligi o‘zbekistonliklarni safarlarni rejalashtirishda ehtiyot choralarini ko‘rish va rasmiy manbalar orqali e’lon qilinayotgan tavsiyalarga amal qilishga chaqirdi.

Shu bilan birga, O‘zbekistonning Isroildagi elchixonasi vatandoshlarni hushyorlikka chaqirib, xavfsizlik qoidalariga qat’iy rioya qilish va zarurat bo‘lmasa ko‘chaga chiqmaslik bo‘yicha shoshilinch tavsiyalar bilan chiqdi. Diplomatik vakolatxona xotirjamlikni saqlash muhimligini ta’kidlab, vaziyat barqarorlashgunga qadar Isroil hududini vaqtincha tark etishni tavsiya etgan.

Bundan tashqari, O‘zbekiston aviatsiya rasmiylarining ko‘rsatmasiga binoan Umra dasturi bo‘yicha Saudiya Arabistoniga ziyoratchilarni olib borish vaqtincha to‘xtatildi. Shu munosabat bilan Jidda—Toshkent yo‘nalishida O‘zbekiston fuqarolarini vatanga qaytarish uchun maxsus repatriatsiya reyslari tashkil etiladigan bo‘ldi.

Toshkentda tirbandlikni kamaytirish uchun “Dolzarb 90 kunlik” boshlanadi

Toshkent shahar hokimligi yo‘l harakati holatini yaxshilashga qaratilgan “Dolzarb 90 kunlik” tashabbusini e’lon qildi. Dastur doirasida poytaxtda eng tirband hisoblangan 472 km avtomobil yo‘llari aniqlanib, bir qator ustuvor yo‘nalishlarda ishlar boshlanadi.

Tashabbus doirasida quyidagi yo‘nalishlarga ustuvor ahamiyat beriladi:

- yo‘l harakatini tashkil etish bo‘yicha loyiha yechimlarini ishlab chiqish va joriy qilish;

- jamoat transportiga ustuvorlik berish va tegishli infratuzilmani yaratish;

- ko‘cha-yo‘l tarmog‘i bo‘ylab reklama konstruksiyalari va boshqa tashuvchilarni o‘rnatishni tartibga solish hamda nazorat qilish va boshqalar.

Qoraqalpog‘iston va Xorazmda tabiiy gaz uchun isitish mavsumi bazaviy me’yori 15 martgacha uzaytirildi

Qoraqalpog‘iston Respublikasi va Xorazm viloyati aholisi uchun tabiiy gaz iste’moli bo‘yicha isitish mavsumida amal qiluvchi 500 kub metrlik bazaviy me’yor 2026 yilning 15 mart sanasiga qadar uzaytirildi.

Energetika sohasi mutasaddilari ma’lum qilishicha, ushbu qaror ob-havo prognozlari asosida qabul qilingan. Unga ko‘ra, mart oyining dastlabki o‘n besh kunida mazkur hududlarda havo haroratining me’yordan past bo‘lishi kutilayotgani qayd etilgan.

O‘zbekistonlik bokschilar “Stranja-2026” musobaqasida 7 ta oltin medalni qo‘lga kiritdi

Bolgariya poytaxti Sofiya shahrida boks bo‘yicha an’anaviy va nufuzli “Stranja” turniri yakunlandi. Musobaqaning final bahslarida o‘zbekistonlik 11 nafar bokschi ringga chiqdi. Yakunda ulardan 7 nafari g‘alaba qozonib, oltin medalga sazovor bo‘ldi. 4 nafari musobaqani kumush, 6 nafari esa bronza medali bilan yakunladi.