AQSh desantchilari Yaqin Sharqqa yetib keldi

Guruh tarkibidan 3500 ga yaqin dengizchi va dengiz piyodalari hamda transport va qiruvchi samolyotlar, desant vositalari va boshqa texnikalar o‘rin olgan.

Foto: U.S. Central Command

AQSh harbiy-dengiz kuchlarining «Tripoli» nomli desant kemasi «AQSh qurolli kuchlari markaziy qo‘mondonligining javobgarlik zonasi»ga yetib keldi.

Markaziy qo‘mondonlik (CENTCOM) bayonotida uning aniq manzili keltirilmagan, ammo avvalroq kema Yaqin Sharqqa suzayotgani ma’lum qilingandi. Ushbu kema 31-dengiz piyodalari ekspeditsiyasi tarkibidagi «Tripoli» desant guruhi flagmani hisoblanadi.

«Guruh tarkibiga 3500 ga yaqin dengizchi va dengiz piyodalari hamda transport va qiruvchi samolyotlar, desant vositalari va boshqa texnikalar kiradi», – deyiladi xabarda.

Ushbu guruh bungacha Yaponiya hududida turgandi.

26 mart kuni The Wall Street Journal kongressdagi manbalariga tayanib «yaqin vaqt ichida» AQShning Eronga qarshi quruqlikdagi operatsiyasi boshlanishi haqida xabar bergandi.

AQSh dengiz piyodalaridan Ho‘rmuz bo‘g‘ozini ochish maqsadida Eron janubiy sohillari yaqinidagi bir yoki bir necha orolni egallab olishda foydalanilishi mumkin.

Tayyorlagan Дилшодбек Асқаров

#AQSh #desant #Yaqin Sharq

Eron yadro dasturi bo‘yicha muzokaralar rasman tugamay turib, 2026 yil 28 fevral kuni AQSh va Isroil Eron hududiga zarbalar bera boshladi. Prezident Donald Tramp hujumlardan maqsad Tehrondagi rejimni ag‘darish ekanini e’lon qildi.