«Aliment»chilarga yangi cheklovlar, «texpasport»ga 5 yillik muddat va poyezd kechiksa kompensatsiya – mahalliy dayjest

Poyezd kechikkani uchun yo‘lovchilarga pulli kompensatsiya to‘lash tartibi belgilanmoqda. Avtomototransport vositasini ro‘yxatdan o‘tkazish haqidagi guvohnoma (texpasport) har 5 yilda almashtiriladi. Toshkentda 4 egizak dunyoga keldi. Kunning shu va boshqa muhim yangiliklari bilan tanishtiramiz.

Tashuvchi aybi bilan poyezd kechiksa, yo‘lovchilarga kompensatsiya to‘lanadi

O‘zbekistonda poyezd kechikkani uchun yo‘lovchilarga pulli kompensatsiya to‘lash tartibi belgilanmoqda. Ma’lum qilinishicha, so‘nggi vaqtlarda qo‘mitaga kelib tushayotgan murojaatlar hamda ijtimoiy tarmoqlardagi fikrlarda temiryo‘lda yo‘lovchi poyezdlarining belgilangan jadvaldan kechikishi, jo‘nab ketishi kechikkani yoki manzilga kech yetib kelgani holatlari yuzasidan e’tirozlar bildirilgan.

Qayd etilishicha, poyezd kechikkan hollarda mahalliy yo‘nalishlardagi oddiy va tezyurar poyezdlarda yo‘lovchilarga quyidagi miqdorlarda kompensatsiya to‘lash belgilanmoqda:

• 15-30 daqiqa kechikkani uchun yo‘lkira qiymatining 15 foizi miqdorida;
• 31-60 daqiqa kechikkani uchun yo‘lkira qiymatining 25 foizi miqdorida;
• 61-120 daqiqa kechikkani uchun yo‘lkira qiymatining 50 foizi miqdorida;
• 121 daqiqadan ortiq kechikkani uchun yo‘lkira qiymatining 100 foizi miqdorida.

Ma’lumot uchun, yuqoridagi tartib hozirda faqat “Afrosiyob” poyezdlari kechikishi uchun mavjud edi.

“Texpasport”ni har 5 yilda yangilash talabi kiritildi

O‘zbekistonda avtomototransport vositasini ro‘yxatdan o‘tkazish haqidagi guvohnoma (texpasport) endi 5 yil muddatga beriladi. Bu – 30 mart kuni imzolangan hukumat qarorida ko‘zda tutilgan.

Ma’lumot uchun, amaldagi “texpasport”larda berilgan sanasi ko‘rsatilgan, lekin amal qilish muddati ko‘rsatilmagan.

Avtomobillarni qayta ro‘yxatdan o‘tkazib, yangi texpasport berishda BHM 10 foizi (hozir 41 200 so‘m) miqdorida to‘lov undiriladi.

Aliment qarzi borlar uchun yangi cheklovlar joriy etiladi

2026 yil 1 maydan aliment bo‘yicha qarzdorlik mavjud bo‘lganda, u to‘liq bartaraf etilguniga qadar qarzdorlarga nisbatan qator cheklovlar joriy etiladi.

Jumladan, qarzdorlarga alohida yirik bitimlarni amalga oshirish, shuningdek ayrim turdagi moliya-kredit va davlat xizmatlaridan foydalanish cheklanishi mumkin. Farmon bilan bir qator boshqa o‘zgarishlar ham nazarda tutilgan. Xususan, ayrim holatlarda qarzdor vafot etganda yoki bedarak yo‘qolgan deb topilganda ijro ishlarini davlat ijrochisining qarori bilan tugatish tartibi joriy etiladi.

Mobil tariflarga yangi talablar qo‘yiladi

Hukumatning tegishli qarori loyihasida mobil aloqa xizmatlarini litsenziyalash tartibiga qo‘shimchalar kiritish taklif etilgan. Unga muvofiq, operatorlar tomonidan faqat telefon qo‘ng‘iroqlari uchun daqiqalar va yoki SMS-xabarnomalardan iborat alohida tarif rejalari ham mavjud bo‘lishi kerak.

Loyihada yana bir muhim talab sifatida tarif rejalari nomlarini ularning shartlariga bog‘lab nomlashga yo‘l qo‘ymaslik belgilanmoqda. Ya’ni tarif nomi abonent to‘lovi, internet trafigi, qo‘ng‘iroq daqiqalari yoki SMS sonini bevosita ifoda etmasligi lozim bo‘ladi.

Toshkentda 4 egizak dunyoga keldi

Toshkent viloyati, Toshkent tumanida yashovchi Odiljon va Sevara Abdullayevalar oilasida biryo‘la 4 egizak tug‘ildi. Ular 2 yoshli qizini tarbiyalab kelayotgan edi. Endi 5 nafar farzandning ota-onasiga aylandi.

SSV matbuot xizmatiga ko‘ra, chaqaloqlar (2 o‘g‘il va 2 qiz) Respublika perinatal markazida muddatidan oldin kesarcha kesish amaliyoti orqali dunyoga kelgan.

Ta’kidlanishicha, chaqaloqlar tibbiyot muassasasida xalqaro protokollar asosida parvarishlanmoqda.