“Vaynlar vaqtinchalik, bularning orqasida faqat pul yotibdi” - aktyor Mehriddin Rahmatov bilan suhbat

Aktyor Mehriddin Rahmatov otasidan olgan tarbiya, halollik qadriyatlari va bugungi kunda uni o‘ylantirayotgan masalalar haqida ochiq gapirdi.

Kun.uz taniqli san’atkorlar bilan suhbatlarini davom ettiradi. Podkast mehmoni o‘zbek teatr va kino san’atida ko‘plab rollari orqali tomoshabinlar e’tiborini qozongan, O‘zbekistonda xizmat ko‘rsatgan artist Mehriddin Rahmatov bo‘ldi.

“Tepa”dagilar och qolishardi

“Bizda nimaiki bo‘lsa bu otamizdan, onamizdan. Buni rad etishga haqqimiz yo‘q. Ota-ona tanlanmaydi, biz o‘z-o‘zimizdan bu darajaga erishmaymiz. Chunki ular birinchi o‘rinda turadi. Hozir qanday darajaga erishgan bo‘lsam, juda katta mehnatlari singgan deb o‘ylayman. Bunga sabab – otamning bergan halol luqmasi deb o‘ylayman. Otam oddiy shofyor bo‘lib ishlaganlar. U paytda “kolxoz” bo‘lardi, shunda shofyorlik qilganlar. Otamning bitta xususiyatlari luqma masalasiga jiddiy qaraganlar. O‘sha paytda qirqta shofyorga boshliq qilib qo‘yishgan. Otamdan oldin boshliq bo‘lgan odam “uchastka”lar qurdi. Keyin majburlab otamni qo‘yishdi. Bir kuni kechqurun otam bilan onamning suhbatlarini eshitib qoldim. Onam aytyaptilar “siz ham bir yo‘lini qiling, uyni qayta qurish kerak” desalar, otam “qilolmayman” dedilar. Olti oy ishladilar. Qo‘llarida qirqta shofyor bo‘lsa, bir kunda har biri ikki so‘mdan topsa, bir so‘mini bersa qirq so‘m bo‘ladi. Shuning yigirma so‘mini “tepaga” berib, yigirma so‘mini olib qolish kerak bo‘lgan. Shunaqa porani bitta turi bo‘lgan. Shuni qilmadilar, ololmadilar va berolmadilar. Uyniyam qaytadan qurmadilar. Halol mehnatim bilan shuni qildim, bo‘ldi boshqasini qilmayman dedilar. Olti oydan keyin bo‘shatishdi, chunki bo‘shamasalar ulardan tepadagilar och qolishardi.

Har kuni kechqurun shunday suhbatni eshitganman, “Halol luqma” degan hikoya ham yozganman. Hozir Mehriddin bo‘lib yurishim – dadamning bergan halol luqmasidan deb o‘ylayman. Davlatniki bo‘lsayam – xiyonat qilmasdan, “davlatning mulki, yesa bo‘ladi” demasdan, yemaganliklari va birovga yedirmaganlari uchun hozir Mehriddin bo‘lib o‘tiribman”.

Vaynlar haqida

Yoshlar va zamonaviy kontent, xususan, vaynlar haqida gapirar ekan, aktyor bu yo‘nalishga nisbatan tanqidiy, biroq muvozanatli munosabat bildirdi:

“Vaynlar vaqtinchalik, bularning orqasida faqat pul yotibdi. Bularning ham yaxshilari bor. Men o‘zim o‘ynaganlarim bor. Keling, man bularni ajratmayman. Ba’zi tanlanayotgan mavzular yoshlarga motivatsiya sifatida yaxshi narsalarni beryapti. Ularniyam vaqti bor. Xalq zerikadi”.

Suhbat davomida Mehriddin Rahmatov insonda kam uchraydigan fazilatlar, xususan, farosat haqida fikr bildirdi. U o‘z hayotida bu qadriyatlarni shakllantirishda otasining halollikka qat’iy amal qilgani hal qiluvchi ahamiyat kasb etganini ta’kidladi.

Shuningdek, aktyor atrofidagi ayrim insonlar uni “kibrli” deb baholashi uning qalbiga og‘ir botishini, ayrim hollarda esa ijtimoiy tarmoqlar va zamonaviy muhit ta’sirida aktyorlik kasbini tark etish haqida o‘ylab qolishini ham yashirmadi.

Suhbatning to‘liq versiyasida aktyorning shaxsiy hayoti va ichki kechinmalari, san’atdagi raqobat va bugungi muhitga munosabati, yosh avlod va zamonaviy kontent haqidagi ochiq fikrlari bilan tanishishingiz mumkin. Videoni to‘liq shaklda havola orqali tomosha qiling.

Kanalga:

“Vaynlar vaqtinchalik, bularning orqasida faqat pul yotibdi” — aktyor Mehriddin Rahmatov vaynchilar haqida

O‘zbekistonda xizmat ko‘rsatgan artist Mehriddin Rahmatov Kun.uz’ga bergan ochiq intervyusida otasining halollikka asoslangan hayoti, shaxsiy kechinmalari va bugungi san’at muhiti haqida gapirdi.

“Hozir Mehriddin bo‘lib yurishim – dadamning bergan halol luqmasidan”, deydi u.

U otasining pora berolmagani sabab ishdan ketganini esladi.

“Meni “kibrli” deb baholashlari qalbimga og‘ir botadi”...

Ijtimoiy tarmoqlardagi bosim va muhit ta’sirida ba’zan aktyorlik kasbini tark etish haqida o‘ylab qolishini ham yashirmadi.