«Eng yopiq» davlat tashkilotlari va ozodlikka chiqqan sobiq sudyalar – mahalliy dayjest

Korrupsiyaga qarshi kurashish agentligi 2025 yil yakunlariga ko‘ra davlat tashkilotlarining ochiqlik indeksini e’lon qildi.

14-17 aprel kunlari O‘zbekistonda havo harorati pasayishi, kuchli yomg‘irlar prognoz qilindi.

Toshkent shahar jinoyat ishlari bo‘yicha sudi sobiq sudyalari Odilbek Ilhomjonov, Mirziyod Abidov va Muhtarama Turg‘unova ozodlikka chiqdi.

Poytaxtda intellektual transport tizimi joriy etilmoqda.

Kunning muhim yangiliklari bilan tanishtiramiz.

​​​​​​2025 yilning «eng ochiq» va «eng yopiq» davlat tashkilotlari reytingi e’lon qilindi

Korrupsiyaga qarshi kurashish agentligi 2025 yil yakunlariga ko‘ra davlat organlari va tashkilotlarining ochiqlik indeksini taqdim etdi.

Ochiqlik indeksi - bu davlat tuzilmalarining fuqarolar uchun qanchalik shaffof va qulay ekanini baholovchi ko‘rsatkichdir. U bir nechta omillardan tashkil topadi: axborotdan foydalanish erkinligi, faoliyatining shaffofligi, fuqarolar bilan ishlash, jamiyat ishtiroki, raqamli ochiqlik va boshqalar.

Umumiy reytingda eng yomon ko‘rsatkichni qayd etganlar qatorida Toshkent shahri va viloyati hokimligi, Andijon viloyati hokimligi, «O‘zbekiston temiryo‘llari», Sudyalar Oliy kengashi bor.

Eng yaxshi natijalarni «O‘zbekgidroenergo», «Navoiy kon-metallurgiya kombinati» hamda «O‘zavtosanoat» qayd etdi.

Baholash natijalariga ko‘ra, ochiqlik talablarini bajarish bo‘yicha 66 ta davlat organi «yashil» (2024 yilda 50 ta), 22 tasi «sariq» (35 ta) va 9 tasi «qizil» (13 ta) toifaga kiritildi.

Havo harorati pasayishi va kuchli yomg‘irlar bo‘lishi kutilmoqda

14-17 aprel kunlari O‘zbekistonda havo harorati pasayishi kutilmoqda. Yomg‘ir yog‘ib, ayrim joylarda jalaga, tog‘larda qorga aylanishi, momaqaldiroq bo‘lishi mumkin.

Bu 14 aprel kuni g‘arbiy hududlarga nam havo oqimi kirib kelishi bilan bog‘liq. Qoraqalpog‘iston Respublikasi, Xorazm viloyati va Buxoro viloyatida yomg‘ir yog‘ishi mumkin. 15–16 aprel kunlari nam havo massalari respublika hududiga tarqaladi. Barcha viloyatlarda yomg‘ir yog‘ishi, ayrim joylarda kuchli bo‘lishi, ba’zi joylarda momaqaldiroq bilan qayd etilishi mumkin. Kunduzgi havo harorati +13…+16 darajagacha pasayadi. Respublikaning tog‘oldi va tog‘li hududlarida sel-suv toshqin hodisalari yuzaga kelishi mumkin.

Shukurov ishida qamoqqa olingan sobiq sudyalar garov evaziga ozodlikka chiqdi

Toshkent shahar jinoyat ishlari bo‘yicha sudi sobiq sudyalari Odilbek Ilhomjonov, Mirziyod Abidov va Muhtarama Turg‘unova ozodlikka chiqdi. Ularga qo‘llangan qamoqqa olish tarzidagi ehtiyot chorasi garovga o‘zgartirilgan. Sud raisi sobiq o‘rinbosari – jinoyat ishlari bo‘yicha sudlov hay’ati raisi Murodjon Mirzajonovni qamoqda saqlash muddati esa uzaytirilgan.

Ilhomjonov, Abidov va Turg‘unova adolatsiz hukm chiqarishda, Mirzajonov esa adolatsiz hukm, hal qiluv qarori, ajrim yoki qaror chiqarish hamda tergov qilishga yoki sud ishlarini hal etishga aralashish jinoyatlarida ayblanmoqda. Hozir tergov davom etmoqda.

Bosh prokuraturaga ko‘ra, Murodjon Mirzajonov sudyalarga qonunga xilof ravishda ta’sir o‘tkazishi oqibatida ular Akmal Shukurovning 8 yil 1 oy ozodlikdan mahrum qilinish jazosini 4 yil 1 oy muddatga ozodlikni cheklash jazosiga o‘zgartirib, sud zalida ozod etgan.

Toshkentda intellektual transport tizimi joriy etiladi

Toshkent shahar Yo‘l harakatini tashkil etish markaziga ko‘ra, poytaxtda intellektual transport tizimi joriy etilmoqda. Ta’kidlanishicha, bu tizim har bir chorrahani shunchaki «to‘xtash va harakatlanish joyi» emas, balki vaziyatni tahlil qilib, oqimni aqlli boshqaradigan markazga aylantiradi.

Svetofor maxsus datchiklar orqali mashinalar oqimini «ko‘radi». Agar bir yo‘nalish bo‘sh bo‘lsa, u yashil chiroqni behuda yondirib turmaydi, balki tirbandlik yuzaga kelgan tomonga tezroq yo‘l beradi. Tizim yaqinlashayotgan avtobusni taniydi va uning jadvaldan kechikmasligi uchun yashil chiroq vaqtini avtomatik uzaytirib berishi mumkin.