Rivaldoga qarzni to‘lamaydigan “O‘zbekneftgaz” va navbatdagi moliyaviy piramida – mahalliy dayjest

“Bunyodkor” futbol klubini moliyalashtirishni to‘xtatgan “O‘zbekneftgaz” kompaniyasi braziliyalik yulduz Rivaldo oldidagi qarzni to‘lamasligini ma’lum qildi. O‘zbekistonda Befree nomi ostida yana bir moliyaviy piramida ishlayotgani ma’lum bo‘ldi. Mobil aloqa foydalanuvchilariga raqamini boshqa shaxsning nomiga masofadan o‘tkazish imkoniyati yaratildi. Namanganda maktablar “Mutolaa” platformasida majburiy obunaga jalb qilinayotgani aytildi. Kunning muhim yangiliklari bilan tanishtiramiz.

“O‘zbekneftgaz” Rivaldoga qarzni to‘lamaydi

“Bunyodkor” futbol klubini moliyalashtirishni to‘xtatgan “O‘zbekneftgaz” kompaniyasi braziliyalik yulduz Rivaldo oldidagi qarzni to‘lamasligini ma’lum qildi.

Kompaniya raisining birinchi o‘rinbosari Suhrob Hamroyev so‘zlariga ko‘ra, ushbu qarzni to‘lash “O‘zbekneftgaz”ning emas, balki klubning majburiyati.

Ta’kidlanishicha, hozir biror klub “O‘zbekneftgaz” tomonidan moliyalashtirilayotgani yo‘q, bu ishlar 2026 yil 1 yanvardan to‘xtatilgan. Rivaldo 2008-2010 yillarda “Bunyodkor”da o‘ynagan. Klubning unga qarzi qancha ekani aytilmagan.

“6 oyda dollarda millionerga aylanasiz!” – navbatdagi moliyaviy piramida

O‘zbekistonda Befree nomi ostida yana bir moliyaviy piramida ishlayotgani ma’lum bo‘ldi. U odamlarga kraudfanding loyiha sifatida tanishtirilmoqda. Befree’da bir necha oyda dollarda millionerga aylanish va’da qilinyapti.

Befree O‘zbekistonda Telegram’dagi bir nechta yopiq guruhlarda targ‘ib qilib kelingan. Shulardan biri “Omadli milliarderlar” guruhi. Uni Navoiy viloyati, Qiziltepa tumanidagi maktablardan birining o‘qituvchisi yuritgan. Aytishicha, u Befree moliyaviy piramida ekanini bilmagan holda uni targ‘ib qilgan.

Befree doimiy ravishda yangi ishtirokchilarning mablag‘larini jalb qilish orqali tuzilma a’zolariga daromad to‘lab borish tizimiga asoslangan. Bu barcha moliyaviy piramidalarga xos bo‘lgan belgi.

Telefon raqamni boshqa shaxsning nomiga o‘tkazish osonlashdi

Mobil aloqa foydalanuvchilari MyGov orqali mobil telefon raqamini boshqa shaxsning nomiga onlayn tarzda o‘tkazishi mumkin.

Portal ma’muriyatining qayd etishicha, avval raqam egasini o‘zgartirish uchun har ikki tomon (raqamning amaldagi egasi va yangi egalik qiluvchi shaxs) aloqa operatori ofisiga shaxsan borishi, navbat kutishi va hujjatlar imzolashi talab etilardi. Endi bu jarayonlar raqamlashdi. Hozir bu qulaylikdan Uztelecom, Beeline va Mobiuz abonentlari foydalana oladi. Xizmat qolgan operatorlar uchun ham bosqichma-bosqich joriy etiladi.

Namanganda maktablar “Mutolaa” platformasida majburiy obunaga jalb qilinayotgani aytildi

Namangan viloyatidagi ayrim maktablarda o‘qituvchi va o‘quvchilar “Mutolaa” loyihasi ilovasiga majburiy obuna bo‘lishga jalb etilmoqda.

Maktablarda ma’naviy-ma’rifiy ishlar uchun mas’ul xodimlarga «yuqoridan» topshiriq berilgan bo‘lib, ular bu vazifani barcha sinf rahbarlariga yuklagan. Natijada boshlang‘ich va yuqori sinf o‘quvchilariga mazkur platformani yuklab olib, skrinshot yuborish topshirig‘i berilgan.

Har bir maktabga kunlik kamida 200 ta obuna jalb qilish bo‘yicha norasmiy limit belgilangan. Obuna bo‘lish bepul. Topshiriq yuzasidan rasmiy xat yoki buyruq mavjud emas.