Trampning million dollarlik «oltin vizasi» badavlat xorijliklar orasida qiziqish uyg‘otmadi

AQSh prezidenti ma’muriyati Donald Tramp tashabbusi bilan 2025 yil dekabr oyida ishga tushirilgan «oltin viza» dasturi bo‘yicha arizalar haqidagi ma’lumotlarni e’lon qildi. Oq uy rahbari uni badavlat odamlar uchun AQSh fuqaroligini olishning tezkor yo‘li sifatida reklama qilgan edi («Oltin viza» narxi 1 million dollardan boshlanadi).

Aprel oyining oxiriga kelib, «oltin viza» uchun 338 ta ariza topshirildi. Ushbu arizachilar orasida atigi 165 kishi 15 ming dollar miqdorida qaytarib berilmaydigan ro‘yxatdan o‘tish badalini to‘lagan va faqat 59 kishi keyingi bosqichga — AQSh Ichki xavfsizlik vazirligida hujjatlarni to‘ldirish jarayoniga o‘tgan.

The Washington Post gazetasining yozishicha, immigratsiya huquqshunoslari mijozlarni «oltin viza» dasturida ishtirok etishdan qaytarmoqda, chunki u Kongress tomonidan tasdiqlanmagan va prezident farmoni bilan istalgan vaqtda bekor qilinishi mumkin. Bundan tashqari, u sud jarayonlari tahdidiga duch keladi va xorijiy investorlar uchun boshqa immigratsiya dasturlariga nisbatan soliq imtiyozlarini bermaydi.

«Oltin viza» dasturi bilan ishlashni istamaydigan huquqshunoslar orasida The Washington Post birinchi xonim Melaniya Tramp va uning ota-onasiga AQSh fuqaroligini olishda yordam bergan Maykl Uaylds nomini tilga oldi.

An’anaviy EB-5 investitsiya vizasi arzonroq – 800 ming dollar yoki 1,05 million dollar talab qiladi, biroq 10 ta ish o‘rni yaratish sharti bilan. U 2025-2026 yillarda yuqori talabga ega bo‘ldi (ayniqsa, mintaqaviy markazlar orqali minglab arizalar kelib tushdi). Ko‘pchilik badavlat odamlar shunday sinalgan va ishonchli yo‘lni afzal ko‘rmoqda.