O‘zbekiston aksiyalari Londonda va sobiq amaldorlar uchun ehtimoliy cheklov – mahalliy dayjest

18 may kuni London fond birjasida (LSE) O‘zbekiston Milliy investitsiya jamg‘armasi (UzNIF) aksiyalarining ilk ommaviy joylashtirilishi bo‘lib o‘tdi. Davlat idoralarida ishlagan rahbarlarning o‘zi nazorat qilgan tashkilotlarga ishga o‘tishiga nisbatan cheklov joriy etilishi mumkin. Buxoroda bezori yoshlar, Farg‘onada talonchilar to‘dasi ushlandi. Uchta davlat tashkilotining 23 mlrd so‘mlik davlat xaridlarida qoidabuzarliklar aniqlandi. Kunning muhim yangiliklari bilan tanishtiramiz.

O‘zbekiston aksiyalari London fond birjasiga joylashtirildi

18 may kuni dunyoning eng yirik va qadimiy birjalaridan biri - London fond birjasida (LSE) O‘zbekiston Milliy investitsiya jamg‘armasi (UzNIF) aksiyalarining ilk ommaviy joylashtirilishiga bag‘ishlangan rasmiy marosim bo‘lib o‘tdi.

Tadbirda prezident administratsiyasi rahbari Saida Mirziyoyeva hamda O‘zbekiston prezidentining iqtisodiy siyosat bo‘yicha maslahatchisi o‘rinbosari Obid Hakimov ishtirok etdi. Avvalroq Milliy investitsiya jamg‘armasining 31 foiz ulushi 603,6 mln dollarga sotilgani xabar qilingandi.

UzNIF portfeliga quyidagi kompaniyalar kiradi: «Hududiy elektr tarmoqlari», «Issiqlik elektr stansiyalari», «O‘zbekgidroenergo», «O‘zbektelekom», «Uzbekistan Airways», «Temiryo‘linfratuzilma», «Hududgazta’minot», «Toshshahartransxizmat», «O‘zbekiston MET» AJ, «O‘zbekiston respublika tovar-xomashyo birjasi», «O‘zbekinvest», «O‘zsuvta’minot» va «O‘zsanoatqurilishbank».

Ikki yillik cheklov: sobiq amaldorlar uchun yangi tartib taklif etildi

Davlat idoralarida ishlagan ayrim rahbar va mas’ul xodimlarning o‘zi nazorat qilgan tashkilotlarga ishga o‘tishiga nisbatan yangi cheklovlar joriy etilishi mumkin. Bu bo‘yicha tegishli nizom loyihasi ishlab chiqildi.

Loyihaga ko‘ra, davlat organi yoki boshqa tashkilotda mehnat shartnomasi tugatilgan yoki xizmatdan bo‘shatilgan xodim so‘nggi ikki yil davomida o‘zi bevosita yoki bilvosita nazorat qilgan tashkilotga ishga qabul qilinishi uchun korrupsiyaga qarshi ichki nazorat bo‘linmasining xulosasi talab etiladi.

Hujjatda ta’kidlanishicha, mazkur tartibning asosiy maqsadi manfaatlar to‘qnashuvining oldini olish, xizmat vakolatlaridan shaxsiy manfaatlar yo‘lida foydalanish xavfini kamaytirish hamda «aylanma eshik» holatlariga yo‘l qo‘ymaslikdan iborat.

Buxoroda bezori yoshlar, Farg‘onada talonchilar to‘dasi ushlandi

Buxoro shahrida ayrim masalalalarni «ko‘cha» usulida hal qilmoqchi bo‘lgan yoshlardan iborat guruh a’zolari ushlandi. IIV xabariga ko‘ra, guruh a’zolari ijtimoiy tarmoqlarda tortishib qolgan yoshlar bilan «masalani hal qilish» uchun uchrashuv belgilagan. Ular uchrashuvga kelgan yoshlarni 10-15 kishi bo‘lib kaltaklagan. Shuningdek, jabrlanuvchilarning Nexia mashinasiga ham jiddiy shikast yetkazgan. Olib borilgan surishtiruvlar natijasida mazkur holatga aloqador 13 nafar gumonlanuvchi shaxsi aniqlanib, holat yuzasidan jinoyat ishi qo‘zg‘atilgan.

Shuningdek, Farg‘onada maktab o‘quvchilarini qo‘rqitib, telefonlarini, pullarini olib qo‘yganlar ushlandi. Viloyat IIB xabariga ko‘ra, 6 kishidan iborat guruh tarkibida 18, 20 va hatto 15 yoshli voyaga yetmagan shaxs ham bo‘lgan. Ta’kidlanishicha, guruhga muqaddam Jinoyat kodeksining 97-moddasi (Qasddan odam o‘ldirish) bilan sudlangan, 2004 yilda tug‘ilgan shaxs yetakchilik qilgan.

Qayd etilishicha, ular shaharning Qirguli mavzesidagi maktab o‘quvchilari va fuqarolarni qo‘rqitib, tan jarohati yetkazish bilan tahdid qilib, telefon va moddiy qimmatliklarni o‘g‘rilik, firibgarlik, talonchilik yo‘li bilan qo‘lga kiritgan.

Uchta davlat tashkilotining 23 mlrd so‘mlik davlat xaridlarida qoidabuzarliklar aniqlandi

Qiymati 23 mlrd so‘mdan ortiq bo‘lgan davlat xaridlarida qonunbuzilish holatlari yuzasidan tegishli choralar ko‘rildi, deb xabar berdi Raqobat qo‘mitasi.

Olib borilgan o‘rganishlarga ko‘ra:

- Yoshlar ishlari agentligi tomonidan o‘tkazilgan jami qiymati 9,1 mlrd so‘mdan ortiq bo‘lgan 6 ta;

- Innovatsion rivojlanish agentligi tomonidan o‘tkazilgan jami qiymati 8 mlrd so‘mga yaqin bo‘lgan 6 ta;

- Maktabgacha va maktab ta’limi vazirligi tomonidan o‘tkazilgan jami 6,7 mlrd so‘mga yaqin bo‘lgan 10 ta tanlov savdolarida raqobatni cheklaydigan yoki cheklashga olib kelishi mumkin bo‘lgan harakatlar aniqlangan.

Qo‘mita maxsus komissiyasi tomonidan buyurtmachi tashkilotlarga nisbatan ish qo‘zg‘atilgan.