Qo‘riqlash xizmatiga yangi vakolatlar va erini urgan ayolning jazolanishi – mahalliy dayjest

Endi ayrim ma’muriy huquqbuzarliklarga oid ishlar Qo‘riqlash xizmatining mansabdorlari tomonidan ko‘rib chiqiladi. Erini urgan ayol jinoiy javobgarlikka tortilib, yirik miqdorda jarima to‘laydigan bo‘ldi. Futbol bo‘yicha O‘zbekiston milliy jamoasini jahon chempionatiga kuzatish tadbiri o‘tkaziladi. Voyaga yetmagan bola mashinada uch qizni urib yubordi, ulardan biri vafot etdi. Kunning muhim yangiliklari bilan tanishtiramiz.

O‘zbekiston milliy jamoasini jahon chempionatiga kuzatish tadbiri o‘tkaziladi

22 may kuni Toshkentdagi «Bunyodkor» stadionida futbol bo‘yicha O‘zbekiston milliy jamoasini jahon chempionatiga tantanali kuzatish marosimi o‘tkaziladi.

Shu sabab ayrim ko‘chalarda soat 16.00–21.00 oralig‘ida transport vositalari harakati vaqtincha cheklanadi.

AQSh, Kanada va Meksika mezbonligida o‘tadigan jahon chempionati 11 iyun kuni boshlanib, 19 iyulda yakunlanadi. Turnirda ilk bor 48 jamoa ishtirok etadi. O‘zbekiston milliy jamoasi guruh bosqichida Portugaliya, Kolumbiya va Kongo DR bilan o‘ynaydi.

Bungacha Fabio Kannavaro bosh murabbiyligidagi o‘zbekistonliklar 1 iyun kuni Edmonton shahrida Kanada milliy jamoasi, 8 iyun kuni Nyu Yorkda Niderlandiya milliy jamoasiga qarshi o‘rtoqlik o‘yini o‘tkazadi.

Qo‘riqlash xizmatiga yangi vakolatlar berildi

Endi ayrim ma’muriy huquqbuzarliklarga oid ishlar Ichki ishlar vazirligi huzuridagi Qo‘riqlash xizmatining mansabdor shaxslari tomonidan ko‘rib chiqiladi. Bu haqda 19 may kuni qabul qilingan qonunda so‘z boradi.

Unga ko‘ra, quyidagi ma’muriy huquqbuzarlikka oid ishlar IIO huzuridagi Qo‘riqlash xizmati boshlig‘i va o‘rinbosarlari tomonidan ko‘rib chiqiladi:

- jamoat joylarida tamaki va alkogol mahsulotini iste’mol qilish;

- belgilanmagan joylarga chiqindilarni tashlash va to‘kish;

- voyaga yetmagan shaxsni g‘ayriijtimoiy xatti-harakatlarga jalb qilish;

- maishiy shovqinga qarshi kurash talablarini buzish;

- oz miqdorda talon-taroj qilish;

- mayda bezorilik;

- diniy materiallarni qonunga xilof ravishda tayyorlash, saqlash, olib kirish yoki tarqatish;

- quroldan belgilangan tartibni buzgan holda foydalanish;

- sovuq qurolni olib yurish va boshqalar.

Erini urgan ayol jinoiy javobgarlikka tortildi

Farg‘ona shahrida erini urgan ayol jinoiy jazoga tortildi. Sud hukmiga ko‘ra, 27 yoshli ayol 2026 yil 20 fevral kuni eri bilan oilaviy kelishmovchilik sabab o‘zaro janjallashgan. Ayol janjal paytida erini qo‘li bilan urib, qasddan tan jarohati yetkazgan. Ayol sudda aybiga iqror bo‘lgan. U ko‘rsatmasida o‘zini himoya qilmoqchi bo‘lib, erini turtib yuborganini aytgan. Jabrlanuvchi erkak esa xotinini kechirmasligini aytib, suddan unga nisbatan qonuniy chora ko‘rishni so‘ragan.

Sud hukmi bilan ayol Jinoyat kodeksining 126-1-moddasi (oilaviy zo‘ravonlik) 2-qismida nazarda tutilgan jinoyatni sodir etganlikda aybli deb topildi. Unga BHM 20 baravari (8 mln 240 ming so‘m) miqdorida jarima jazosi tayinlandi.

Voyaga yetmagan bola mashinada uch qizni urib yubordi, ulardan biri vafot etdi

Qo‘qon shahrida voyaga yetmagan bola Malibu avtomobilini boshqarib, piyodalar yo‘lagidan o‘tayotgan 3 nafar qizni urib yubordi. Jabrlanganlarning barchasi 10 yoshda ekani aytilmoqda. Oqibatda qizlardan biri tan jarohatlari tufayli shifoxonada vafot etgan.

Holat yuzasidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Bola protsessual tartibda ushlangan. Hozir dastlabki tergov harakatlari olib borilmoqda.