Bojxona xodimi bo‘lish uchun qaysi o‘quv yurtini tugatish kerak?

SAVOL: O‘zbekiston Respublikasining bojxona organlari xizmatiga ishga qabul qilinish uchun qaysi mutaxassislik bo‘yicha oliy bilim yurtini tugatgan bo‘lishi kerak va qanday hujjatlar talab qilinadi?

Zarina Istamova.

JAVOB: Amaldagi tartibga ko‘ra, bojxona organlari xizmatiga asosan oliy yuridik yoki iqtisodiy ma'lumotiga ega, Qurolli kuchlar safida harbiy xizmatni o‘tagan yoki safarbarlik chaqiruv rezervida bo‘lgan, 18 yoshga to‘lgan, lekin 30 yoshdan oshmagan O‘zbekiston Respublikasi fuqarolari ko‘ngililik asosida xizmatga qabul qilinadi.

O‘zbekiston Respublikasi Vazirlar Mahkamasining 2003 yil 22 maydagi 229-sonli qarori asosida tashkil etilgan Oliy harbiy bojxona instituti bojxona organlari uchun bojxona ishi va yurisprudensiya mutaxassisliklari bo‘yicha kadrlar tayyorlovchi tayanch oliy o‘quv yurti bo‘lib, hozirda bojxona organlaridagi bo‘sh o‘rinlar asosan uni har yili bitirayotgan tinglovchilar hisobidan jamlab kelinmoqda.

Bojxona organlariga ishga kirish istagida doimiy ro‘yxatda turgan hududdagi bojxona organlarining Kadrlar xizmatiga murojaat etishingiz mumkinligini, ularning manzili Davlat bojxona qo‘mitasining internetdagi customs.uz saytiga joylashtirilganligini ma'lum qilamiz.

Savolga O‘zbekiston Respublikasi Davlat bojxona qo‘mitasi ma'sul xodimi Aziz Do‘stiyorov javob berdi.

Eslatma: «Yuridik xizmat minbari»da savollarga berilayotgan javoblar tavsiyaviy xarakterga ega.