Shuttle America mintaqaviy aviakompaniyasiga tegishli laynerlardan birining styuardessasi musulmon yo‘lovchilarga nisbatan qo‘pol munosabati uchun ishdan haydaldi. Bu haqda Associated Press agentligi kompaniyaning matbuot xabarnomasiga tayangan holda xabar bermoqda.
Aytilishicha, Shimoli-G‘arbiy universitet xodimasi Tohira Ahmad styuardessadan parhez Koka-Kolasi berishni so‘ragan. Styuardessa esa, yo‘lovchining hijob o‘raganini ko‘rib, uning iltimosini bajarishdan bosh tortgan, sabab sifatida esa u “Kola idishini qurol sifatida qo‘llashi mumkin”ligini ro‘kach qilgan.
Bundan jahli chiqqan Ahmad xonim Feysbuk ijtimoiy tarmog‘ida bo‘lgan voqeani bayon qilgan. Oradan biroz vaqt o‘tib, Tvitterda uni qo‘llab-quvvatlash aksiyasi o‘tkazilgan.
Shundan so‘ng voqea tafsilotlari kompaniya rahbariyatiga ham yetib borgan. Ksenofob styuardessa ishdan bo‘shatilgan.